ایرانڈیا کے طیارہ میں ٹشو پیپر پر بم تحریر، سیکوریٹی ایجنسیاں حرکت میں آگئیں

نئی دہلی: دہلی ایرپورٹ پر آج ایرانڈیا کی پرواز AI819 کے بیت الخلاء میں ایک ٹشو پیپر پایا گیا جس پر لفظ "Bomb” تحریر تھا جس کے ساتھ ہی سیکوریٹی ایجنسیاں حرکت میں آگئیں لیکن یہ ایک جھوٹی دھمکی ثابت ہوئی۔

ایک پولیس عہدیدار نے یہ بات بتائی۔ پولیس نے تفصیلات سے واقف کراتے ہوئے کہا کہ چہارشنبہ کو تقریباً 7:30 بجے شام ایرانڈیا کی ایک پرواز کے بیت الخلاء میں ایک ٹشو پیپر پائے جانے کی اطلاع ملی تھی۔

یہ پرواز وڈودرہ روانہ ہونے والی تھی۔ اس ٹشو پیپر پر لفظ بم تحریر تھا۔ ڈپٹی کمشنر پولیس (آئی جی آئی) ایرپورٹ اوشا رنگنانی نے بتایا کہ معیاری سیکوریٹی طریقہ کار پر عمل کرتے ہوئے جامع تلاشی لی گئی لیکن کوئی مشتبہ شئے نہیں پائی گئی۔

ایرانڈیا نے بتایا کہ سیکوریٹی الرٹ کے بعد تمام مسافروں کو بحفاظت نیچے اتاردیا گیا اور طیارہ کو سیکوریٹی ایجنسیاں ایک ویران پٹی کی طرف لے گئیں۔