امریکی نیشنل وار کالج کے وفد کی وزیر ڈی شریدھر بابو سے ملاقات

حیدرآباد: امریکی نیشنل وار کالج کے ایک وفد نے جمعرات کو ڈاکٹر بی آر امبیڈکر تلنگانہ سکریٹریٹ میں تلنگانہ کے وزیر برائے اطلاعات و صنعت ڈی شریدھر بابو سے خصوصی ملاقات کی۔

ملاقات کے دوران وزیر موصوف نے وفد کو تلنگانہ میں دستیاب سرمایہ کاری کے وسیع مواقع اور خاص طور پر ایرو اسپیس، دفاع اور خلائی شعبوں میں سازگار ماحول کے بارے میں آگاہ کیا۔

شریدھر بابو نے وفد سے اپیل کی کہ وہ امریکی سرمایہ کاروں اور کمپنیوں کو ریاست کے ان ابھرتے ہوئے شعبوں میں سرمایہ کاری کے لیے راغب کریں۔ انہوں نے تلنگانہ کے بڑھتے ہوئے بنیادی ڈھانچے اور پالیسی سازی کے حوالے سے فراہم کی جانے والی سہولیات پر بھی روشنی ڈالی۔

ایک سرکاری بیان کے مطابق، اس گفتگو میں ایرو اسپیس، دفاع اور خلائی شعبوں میں امریکہ اور تلنگانہ کے درمیان دو طرفہ تعاون کو مزید مضبوط بنانے پر توجہ مرکوز کی گئی اور دونوں فریقین نے باہمی اشتراک کو بڑھانے میں گہری دلچسپی کا اظہار کیا۔