Video: طالب علم کوبے رحمی سے مارنےاور استری سے داغنے کا ویڈیو وائرل

حیدرآباد۔: آندھراپردیش کے ضلع مغربی گوداوری کے بھیماورم ٹاؤن میں ایک خانگی انجینئرنگ کالج کے 4طلبہ کوایک ویڈیووائرل ہونے کے بعد گرفتار کرلیاگیا جس میں ان چارطلبہ کو ہاسٹل کے ایک کمرے میں ایک اورطالب علم کوبے رحمی کے ساتھ زدوکوب کرتے ہوئے دکھایا گیا ہے جبکہ متاثرہ طالب علم رحم کی بھیک مانگ رہا ہے۔

اس واقعہ کی ویڈیومیں یہ دکھایاگیاہے کہ متاثرہ طالب علم اپیل کررہا ہے۔معذرت خواہی کررہا ہے اس کے باوجودچاروں طلبہ اسے لاٹھیوں سے ماررہے ہیں۔

اس کی شرٹ پھٹی ہوئی دکھائی دے رہی ہے اوراسے شرٹ نکالنے کے لئے کہاجارہاہے۔متاثرہ اور چار ملزمین ایس آر کے آرانجینئرنگ کالج میں کمپوٹر سائنس کی تعلیم حاصل کررہے ہیں۔

یہ واقعہ چندن قبل پیش آیا تھا۔متاثرہ طالب علم انکت کوایک دواخانہ میں شریک کرادیاگیا ہے اس کے جسم پر زخم کے کئی نشانات ہیں۔

انکت کے سینہ اورہاتھوں پر داغ کے زخم بھی پائے گئے۔شبہ کیاگیاہے کہ ان چارحملہ آواروں نے گرم استری (آئرن باکس) سے انکت کوداغا تھا۔ اس کے علاوہ اسے لاٹھیوں اورپی وی سی پائپوں سے ماراگیا ہے۔ مارنے کی وجوہات کاعلم نہیں ہواہے۔