عثمانیہ یونیورسٹی میں دوسرے دن بھی طلبا کا شدید احتجاج

حیدرآباد: تلنگانہ پبلک سرویس کمیشن کے امتحانی پرچہ کے لیک ہونے کے معاملہ کے خلاف شہرحیدرآباد کی عثمانیہ یونیورسٹی میں دوسرے دن بھی طلبا کی جانب سے شدید احتجاج کیاگیاجس سے یونیورسٹی کیمپس میں کشید گی پھیل گئی۔

 آرٹس کالج کے طلباء نے پیپر لیک واقعہ کے خلاف ریالی نکالنے کی کوشش کی۔ پولیس نے مداخلت کرتے ہوئے انہیں گرفتار کر لیا۔ انہوں نے مطالبہ کیا کہ اس معاملہ کی جانچ برسرخدمت جج یا سی بی آئی سے کروائی جائے۔انہوں نے الزام لگایا کہ حکومت 30 لاکھ طلباء کی زندگیوں سے کھلواڑ کررہی ہے۔

اس موقع پر طلبہ نے تلنگانہ پبلک سرویس کمیشن کو برخاست کرنے کا مطالبہ کیا۔ دوسری طرف، طلبا کے احتجاج کی حمایت کرنے والے کئی کانگریس لیڈروں کو پولیس نے پہلے سے گرفتار کر لیا تھا۔ پی سی سی کے جنرل سکریٹری ادانکی دیاکر کو گھر پر نظر بند کر دیا گیا۔

 تلنگانہ کانگریس کے سربراہ ریونت ریڈی کے مکان پر پولیس کی بھاری تعداد کو تعینات کردیاگیا اور ریونت ریڈی کے مکان کی طرف جانے والی تمام سڑکیں بند کر دی گئیں۔