تلنگانہ کے ضلع کریم نگر میں سڑک حادثہ۔ دونوجوان ہلاک

حیدرآباد: تلنگانہ کے ضلع کریم نگر کے چپہ ڈنڈی میں پیش آئے سڑک حادثہ میں دونوجوان ہلاک ہوگئے۔

یہ حادثہ منگل کی شب اُس وقت پیش آیا جب دومخالف سمت سے آنے والی بائیکس چلانے والوں نے اس کا توازن کھودیا اور یہ بائیکس ایک دوسرے سے متصادم ہوگئیں۔

تفصیلات کے مطابق چپہ ڈنڈی سے تعلق رکھنے والے نوین، راجیش اور سمپت ایک بائیک پر سفرکررہے تھے جبکہ دوسری بائیک پر مہیش اور چرن سفر کررہے تھے۔

دونوں بائیکس کے متصادم ہونے کے نتیجہ میں 20 سالہ نوین موقع پر ہی ہلاک ہوگیا جبکہ مہیش کو شدید زخمی حالت میں علاج کے لئے اسپتال منتقل کیاگیا جہاں اس نے دوران علاج آخری سانس لی۔چرن کی حالت تشویشناک بتائی جاتی ہے۔

پولیس نے اس سلسلہ میں ایک معاملہ درج کرکے جانچ شروع کردی۔