اروند کیجریوال کے استعفیٰ کے بعد دہلی کا چیف منسٹر کون ہوگا؟

نئی دہلی: دہلی کے چیف منسٹر اروند کیجریوال نے چیف منٹسر کے عہدہ سے استعفیٰ دینے کا اعلان کیا ہے، جس نے سیاست میں ہلچل مچا دی ہے۔ کیجریوال نے کہا کہ وہ تب تک چیف منسٹر کی کرسی پر نہیں بیٹھیں گے جب تک عوام ان کی ایمانداری کا فیصلہ نہیں کر لیتے۔ انہوں نے دہلی انتخابات فروری کے بجائے نومبر میں کرانے کی اپیل بھی کی ہے۔

اب سوال یہ ہے کہ کیجریوال کے استعفیٰ کے بعد دہلی کا چیف منسٹر کون بنے گا؟ پارٹی ذرائع کے مطابق، ممکنہ امیدواروں میں آتشی، سوربھ بھردواج، اور سنیتا کیجریوال کے نام شامل ہیں۔

دہلی میں تعلیم، خواتین اور بچوں کی بہبود، ثقافت، سیاحت اور تعمیرات عامہ کے وزیر آتشی کا نام اہمیت اختیار کر رہا ہے۔ آتشی کے پاس پانی اور پی ڈبلیو ڈی کا قلمدان بھی ہے اور کیجریوال کو ان پر کافی بھروسہ ہے۔ ان کے وزیر اعلیٰ بننے کے امکانات کو مدنظر رکھتے ہوئے، ان کا نام سب سے آگے ہے۔

دہلی اسمبلی کے گریٹر کیلاش حلقہ  کی نمائندگی کرنے والے سوربھ بھردواج، جو دہلی جل بورڈ کے سابق چیئرمین بھی ہیں، کے نام پر بھی غور ہو رہا ہے۔ ان کے پاس صحت، شہری ترقی، اور پانی کے وزارتوں کا تجربہ ہے، لیکن حال ہی میں ان کی وزارتیں آتشی کو سونپی گئی تھیں۔

سوربھ بھردواج کو عام آدمی پارٹی کے قومی چیف ترجمان کا عہدہ بھی حاصل ہے، جو ان کے وزیر اعلیٰ بننے کے امکانات کو تقویت دیتا ہے۔

اروند کیجریوال کی اہلیہ سنیتا کا نام بھی چیف منسٹر کے ممکنہ امیدواروں میں شامل ہے۔ تاہم، خیال کیا جا رہا ہے کہ سنیتا سیاست سے دوری اختیار کر سکتی ہیں، خاص طور پر جب اروند کیجریوال جیل سے باہر آ چکے ہیں اور دوبارہ فرنٹ فٹ پر ہیں۔

کیجریوال کے استعفیٰ کے بعد وہ دہلی اور ہریانہ میں عام آدمی پارٹی کی انتخابی مہم چلائیں گے۔ ان کی حکومتی ذمہ داریوں کے خاتمے سے وہ زیادہ آزاد ہو جائیں گے اور پارٹی کی جیت کے لیے کام کریں گے۔ نئے وزیر اعلیٰ کے انتخاب کے بعد، کیجریوال کے لیے ممکنہ طور پر نئے پروجیکٹس کی فائلوں کو LG کو بھیجنے اور فیصلے بدلنے میں آسانی ہوگی۔

دہلی کے نئے وزیر اعلیٰ کے انتخاب کا فیصلہ پارٹی میٹنگ میں ہوگا اور اس کے بعد ہی واضح ہوگا کہ دہلی کی قیادت کس کے ہاتھ میں جائے گی۔