نوجوان نے جلتی ہوئی چتا میں چھلانگ لگا دی، دوران علاج فوت

بھیلواڑہ: راجستھان کے بھیلواڑہ ضلع کے مانکیا گاؤں میں بہن کی جلتی ہوئی چتا پر چھلانگ لگانے والے بھائی کی آج ادے پور کے مہارانا بھوپال اسپتال میں علاج کے دوران موت واقع ہوگئی۔

موصولہ اطلاع کے مطابق جمعرات کو بہن مینا بھیل کی موت کے بعد چچازاد بھائی سکھ دیو بھیل نے اپنے جسم پر آتش گیر مواد ڈال کر بہن کی جلتی ہوئی چتا میں چھلانگ لگا دی تھی۔

اس سے پہلے اس نے موکشدھام کے پاس ایک خط رکھا تھا جس میں لکھا تھا کہ سب کو رام رام۔ میں نے جو بھی کیا، اپنی مرضی سے کیا۔ کوئی کچھ بھی کہے، وہ سچ نہیں ہے۔ سچ تو میرے ساتھ چلا گیا۔ کوئی بھی کسی پر دباؤ نہیں ڈالے۔ جس کی وجہ سے آپ کو پچھتانا پڑے۔

اس کے بعد لوگوں نے سکھ دیو کو جلتی ہوئی چتا سے باہر نکالا اور مہاتما گاندھی اسپتال لے گئے جہاں سے حالت نازک ہونے پر اسے ادے پور ریفر کر دیا گیا۔

سکھ دیو کی ادے پور میں علاج کے دوران موت ہوگئی۔ پوسٹ مارٹم کے بعد لاش ورثاء کے حوالے کر دی گئی۔