بنگلور کے مشہور رامیشورم کیفے میں زورداردھماکہ، 4 افراد زخمی

بنگلورو: بنگلورو کے کنڈلاہلی میں ایک کیفے میں آج ہونے والے دھماکہ میں 4 افراد زخمی ہو گئے ہیں۔ یہ اطلاع پولیس نے دی ہے۔ اس کے ساتھ ہی پولیس کا کہنا تھا کہ یہ جاننے کی کوشش کی جا رہی ہے کہ مشہور ریسٹورنٹ دی رامیشورم کیفے میں دھماکہ کی وجہ کیا تھی۔

 آگ لگنے کی اطلاع ملتے ہی پولیس اور فائر بریگیڈ کے عملہ نے موقع پر پہنچ کر صورتحال پر قابو پالیا۔ پولیس نے بتایا کہ زخمی ہونے والے تین افراد کیفے کے ملازم ہیں۔ ابتدائی تحقیقات میں یہ معلوم نہیں ہو سکا کہ دھماکہ شارٹ سرکٹ کی وجہ سے ہوا یا گیس سلنڈر پھٹنے سے۔

ذرائع کا کہنا ہے کہ دھماکے کے بعد کوئی آگ نہیں لگی اور یہ ایل پی جی سلنڈر کے دھماکے کی طرح نہیں لگتا۔ ان کا کہنا تھا کہ پولیس اس بات کی تحقیقات کر رہی ہے کہ آیا دھماکے کی وجہ گیس پائپ لائن کا لیکیج تھا۔ دھماکے کے بعد فرانزک ٹیم کیفے پہنچ گئی اور معاملے کی تحقیقات کی جا رہی ہیں۔