صاحبزادگان ریسیڈنشیل کالونی کیلئے زمین الاٹ کرنے نویں نظام سے اپیل

حیدرآباد: مجلس صاحبزادگان سوسائٹی اور آصف جاہ اول تا آصف جاہی ششم کے خاندان سے تعلق رکھنے والے صرف خاص کے صاحبزادگان نے پرنس عظمت جاہ بہادر کے نویں نظام کی حیثیت سے تقرر کا خیر مقدم کرتے ہوئے ان کے ساتھ مکمل وفاداری اور یگانگت کا اظہار کیا اور کہا کہ پرنس عظمت جاہ بہادر ہی اس مقام اور منصب کے مستحق ہیں۔

ایسا کوئی بھی فرد جس کا تعلق نظام خاندان سے نہیں ہے‘ وہ اس منصب پر فائز نہیں ہوسکتا۔ 1950ء میں قائم کئے گئے ’صرفخآص ٹرسٹ‘ کی ایک دستاویزی معاہدہ کے مطابق اگر کوئی صاحبزادہ غیر صاحبزادہ لڑکی سے شادی کرتا ہے تو اس کی اولاد صاحبزادگان میں شمار کی جائے گی لیکن اگر کوئی صاحبزادی کسی غیر صاحبزادہ سے شادی کرتی ہے تو اس کی اولاد صاحبزادگان میں شمار نہیں ہوگی۔

صاحبزادگان سے مراد آصف جاہی خاندان کی اولاد ہے۔ اس طرح نظام جو آصف جاہی حکمرانوں کا خطاب رہا ہے‘ اس کا حقدار صرف اور صرف صاحبزادہ ہی ہوسکتا ہے۔

اِن خیالات کا اظہار مجلس صاحبزادگان (حیدرآباد) کے عہدیداروں نے آج یہاں ایک پریس کانفرنس میں کیا۔ صدر مجلس صاحبزادگان میرحشمت علی خاں، صاحبزادہ میر وقارالدین علی خاں، صاحبزادہ میر فیروز علی خاں، نواب فیض محمد صدیقی، صاحبزادہ میر قادر علی خاں اور نواب میر قمرالدین علی خاں آصف جاہ اول کے پڑپوتے نواب میر ظہیرالدین علی خاں نے پریس سے خطاب کرتے ہوئے کہا کہ صاحبزادگان کے مسائل سے نویں نظام پرنس عظمت جاہ بہادر کو واقف کروایا۔ مجلس صاحبزادگان کے عہدیداروں نے بتایا کہ صاحبزادگان کے تعلیم، صحت اور رہائش کے وسائل ہیں‘ میڈیکل الاؤنس ایک اہم مسئلہ ہے۔

مجلس صاحبزادگان نے نویں نظام سے مطالبہ کیا کہ صاحبزدگان کے لئے ایک ریسیڈنشیل کالونی کی تعمیر کے لئے اراضی الاٹ کی جائے۔ نویں نظام میر عظمت علی خاں نے سوسائٹی کو پانچ کروڑ کا عطیہ دینے کا وعدہ کیا۔

تاہم مجلس صاحبزدگان نے ان سے 20کروڑ روپئے کے عطیہ کے لئے گزارش کی ہے۔ یقین ہے کہ وہ اس گزارش کو قبول کریں گے۔ مجلس صاحبزادگان کے نائب صدر نواب میر وقارالدین علی خاں نے آپسی اتحاد کی ضرورت پر زور دیا۔