بیڈمنٹن کھیلنے کے دوران دل کا دورہ پڑنے سے ایک شخص کی موت، تلنگانہ میں ایک اور واقعہ

حیدرآباد: تلنگانہ کے جگتیال میں آج بیڈمنٹن کھیلتے ہوئے ایک شخص کی دل کا دورہ پڑنے سے موت ہوگئی۔
اس شخص کی شناخت 53 سالہ بسا وینکٹاراجا گنگارام کے طور پر ہوئی ہے۔ انہیں اس وقت دل کا دورہ پڑا جب وہ صبح جگتیال کلب میں بیڈ منٹن کھیل رہے تھے۔

سی سی ٹی وی فوٹیج میں دیکھا جاسکتا ہے کہ گنگا رام کھیلتے ہوئے کچھ دیر کے لئے بریک لیتے ہیں اور پھر نیٹ کے ایک پول پکڑلیتے ہیں۔ پھر وہ اچانک گر ہڑتے ہیں جبکہ ایک شخص ان کی مدد کے لئے قریب آ رہا تھا۔

کلب میں موجود دوسرے لوگ یہ دیکھ کر دوڑ پڑے اور ان میں سے ایک شخص نے گنگا رام کو سی پی آر بھی دیا جس کے بعد انہیں دواخانہ لے جایا گیا جہاں ڈاکٹروں نے انہیں مردہ قرار دے دیا۔

تلنگانہ و آندھراپردیش میں حالیہ دنوں میں ہونے والے ایسے واقعات کے سلسلے میں یہ تازہ ترین واقعہ ہے جس میں لوگ اپنے روزمرہ کے کاموں میں مصروف رہتے ہوئے موت کے منہ میں چلے گئے۔

مارچ میں، ایک سکول ٹیچر کو کلاس روم میں دل کا دورہ پڑا اور اس کی موت ہو گئی۔ یہ واقعہ آندھرا پردیش کے باپٹلا ضلع میں پیش آیا۔

28 فروری کو حیدرآباد میں بیڈمنٹن کھیلتے ہوئے ایک شخص دل کا دورہ پڑنے سے فوت ہوگیا۔ 25 فروری کو ایک 19 سالہ نوجوان نرمل ضلع میں اپنے رشتہ دار کی شادی میں ناچتے ہوئے گر کر مر گیا تھا۔

اسی طرح22 فروری کو حیدرآباد کے ایک جم میں ورزش کے دوران ایک 24 سالہ پولیس کانسٹیبل کی دل کا دورہ پڑنے سے موت ہوگئی تھی جبکہ20 فروری کو حیدرآباد میں اپنے رشتہ دار کی شادی میں ہلدی کی تقریب کے دوران ایک شخص بیٹھے بیٹھے اچانک گر کر فوت ہوگیا تھا۔