سرکاری6 میڈیکل کالجوں میں کلاسس کے آغاز کی اجازت

حیدرآباد: نیشنل میڈیکل کونسل (این ایم سی) نے تلنگانہ کے 6سرکاری میڈیکل کالجوں کو تعلیمی سال2023-24 سے کلاسس کے آغاز کی اجازت دے دی۔

ریاستی وزیر صحت ٹی ہریش راؤ نے چہارشنبہ کی شب ٹوئٹ کرتے ہوئے کہا کہ نرمل، کریم نگر، اور سرسلہ میڈیکل کالجوں کی منظوری کا عمل آخری مرحلہ میں پہنچ گیا ہے۔

انہوں نے بتایا کہ این ایم سی نے جاریہ سال سے9کے منجملہ6سرکاری میڈیکل کالجوں میں تعلیمی سرگرمیوں کی شروعات کی اجازت دے دی ہے۔

جن 6کالجوں کو پہلے ہی منظوری مل چکی ہے ان میں جنگاؤں، آصف آباد، کاماریڈی، کھمم، وقار آباد اور بھوپال پلی کے میڈیکل کالجس شامل ہیں جبکہ نرمل، کریم نگر اور سرسلہ میڈیکل کالجس کی منظوری کا عمل قطعی مرحلہ میں داخل ہوچکا ہے۔

انہوں نے کہا کہ حکومت تلنگانہ، چیف منسٹر کے چندر شیکھر راؤ کے صحت مند تلنگانہ (آروگیہ تلنگانہ) کے ویژن کے مطابق ہر ایک ضلع میں ایک میڈیکل کالج کے قیام کے مشن پر تیزی کے ساتھ آگے بڑھ رہی ہے۔