غزہ لڑائی میں عزالدین القسام بریگیڈ کے 4 رہنما شہید

یروشلم: تحریک حماس کے مسلح وِنگ عزالدین القسام بریگیڈ نے حالیہ غزہ کی لڑائی میں اتوار کے روز اپنے 4 اہم رہنماؤں کے شہید ہونے کا اعلان کیا۔

یہ جنگ7 اکتوبر کو شروع ہوئی تھی اور 26 نومبر کو اس جنگ کا 51 واں دن تھا۔ 48 دن لڑائی جاری رہی اور پھر 3 دن سیز فائر کے گزرے۔ پیر کے روز جنگ بندی معاہدہ کے چوتھا اور آخری دن ہوگا۔ منگل کی صبح 7 بجے جنگ بندی معاہدہ ختم ہو جائے گا۔

العربیہ کے مطابق ٹیلی گرام پر عزالدین القسام بریگیڈس کے آفیشل چینل پر شائع ہونے والے ایک بیان میں کہا گیا کہ القسام بریگیڈس اپنے رہنماؤں کے ایک گروپ کی شہادت کا اعلان کر رہا ہے۔

ان کمانڈرس میں عسکری وِنگ کے رکن ابو انس احمد الغندور‘ شمالی بریگیڈس کے کمانڈر وائل رجب‘ کمانڈر رفعت سلمان اور کمانڈر ایمن الصیام شامل ہیں۔اسرائیلی ٹی وی چینل 13 نے ایک ذریعہ کے حوالہ سے بتایا کہ 25 نومبر کو اسرائیلی فوج نے غزہ پٹی میں دوبارہ فوجی آپریشن شروع کرنے کے لیے اپنی تیاری کرلی تھی۔

یہ آپریشن اس صورت میں کیا جانا تھا اگر حماس مقامی وقت کے مطابق آدھی رات تک اسرائیلی یرغمالیوں کی دوسری کھیپ کو رہا نہ کرتی۔قبل ازیں عزالدین القسام بریگیڈس نے یرغمالیوں کی دوسری کھیپ کے حوالہ کرنے میں اس وقت تک تاخیر کا اعلان کیا تھا جب تک کہ اسرائیل‘شمالی غزہ پٹی میں امدادی ٹرکوں کے داخلہ سے متعلق اپنی ذمہ داریاں پوری نہیں کردیتا اور معاہدہ کی پاسداری نہیں کرتا۔

ٹائمس آف اسرائیل نے ایک باخبر ذریعہ کے حوالہ سے بتایا کہ اسرائیل کو ان قیدیوں کی فہرست موصول ہو گئی ہے جنہیں آج اتوار کو رہا کیا جانا تھا۔ اخبار کا کہنا تھا کہ اسرائیلی حکام نے حراست میں لیے گئے افراد کے اہل خانہ کو آگاہ کرنا شروع کیا جن کے نام قطر کی طرف سے سونپی گئی فہرست میں شامل تھے۔

یاد رہے قطر‘ اسرائیل اور تحریک حماس کے درمیان قیدیوں کے تبادلہ کے معاہدہ میں ثالث ہے۔قطری وزارت خارجہ کے ترجمان ماجد الانصاری نے اپنے ملک کی اس امید کا اظہار کیا کہ اسرائیل اور حماس کے درمیان جنگ بندی کو 4 دن پر طے شدہ اتفاق سے آگے بڑھایا جائے گا۔