گروپI امتحان رد کرنے کے مطالبہ پر عدالت میں نئی عرضی

حیدرآباد: گروپI امتحانات کو رد کرنے کا مطالبہ کرتے ہوئے تلنگانہ اسٹیٹ ہائی کورٹ میں آج ایک اور عرضی داخل کی گئی۔11جون کو منعقدہ گروپI امتحان کو رد کرنے کیلئے آج تین امیدواروں نے ہائی کورٹ میں عرضی داخل کی۔

درخواست گذاروں نے اپنی عرضی میں بتایا کہ امتحان کے دن امیدواروں سے بائیو میٹرک لئے بغیر، بغیر ہال ٹکٹ اور تصویر دیکھے، او ایم آر شیٹ حوالہ کردی گئی تھی۔

ان باتوں کو خاطر میں لاتے ہوئے ٹی ایس پی ایس سی کو دوبارہ گروپI امتحان منعقد کرنے کی ہدایت دینے کا مطالبہ کیا گیا۔ واضح رہے کہ 11جون کو گروپI پریلمس امتحان کا پرامن اور نقائص سے پاک انعقاد عمل میں لایا گیا تھا۔

ریاست بھر میں 994مراکز پر منعقدہ ٹسٹ میں 3,80,081 کے منجملہ2,33,248 امیدواروں نے شرکت کی تھی۔ امتحان تحریر کرنے والے امیدواروں کا فیصد61.37 درج کیا گیا تھا۔

ٹی ایس پی ایس سی پیپر لیک تنازعہ کے بعد پریلمس کا دوبارہ انعقاد عمل میں لایا گیا تھا۔

گذشتہ گروپIپریلمس میں امیدواروں کا بائیو میٹرک لیا گیا تھا تاہم اس بار ایسا نہیں کیا گیا تھا جس کو بنیاد بناکر آج تین امیدوار عدالت سے رجوع ہوئے ہیں۔