سکندرآباد کینٹونمنٹ سے 11 فوجی ہتھیار چوری، 4 – AK-47 بھی شامل
یہ ہتھیار مدراس رجمنٹ کے احاطے میں واقع ایک اسٹوریج روم سے غائب ہوئے۔ پولیس کے مطابق کمرے کا تالا اور دروازہ توڑے جانے کے شواہد ملے ہیں
تلنگانہ : تلنگانہ کے سکندرآباد کینٹونمنٹ کے انتہائی حساس فوجی علاقے میں اسلحہ چوری کا ایک سنگین واقعہ سامنے آیا ہے۔ ابتدائی اطلاعات کے مطابق 11 ہتھیار چوری ہوئے ہیں، جن میں 4 AK-47 رائفلیں، 6 پستول اور ایک INSAS رائفل شامل ہیں۔ واقعہ مبینہ طور پر اتوار کی رات پیش آیا۔
یہ ہتھیار مدراس رجمنٹ کے احاطے میں واقع ایک اسٹوریج روم سے غائب ہوئے۔ پولیس کے مطابق کمرے کا تالا اور دروازہ توڑے جانے کے شواہد ملے ہیں۔ فوجی حکام کو ہتھیاروں کے غائب ہونے کا علم ہونے کے بعد متعلقہ علاقے کو سیل کر دیا گیا اور تحقیقات شروع کردی گئیں۔
فوجی اہلکاروں کی شکایت پر بولاّرم پولیس نے پیر کے روز چوری کا مقدمہ درج کیا۔ ملکاجگیری پولیس کمشنریٹ کے سینئر افسران بھی تحقیقات میں شامل ہیں۔ پولیس اور فوجی حکام CCTV فوٹیج، داخلی و خارجی ریکارڈ، سیکیورٹی ڈیوٹی اور ان افراد کی تفصیلات کا جائزہ لے رہے ہیں جنہیں اسلحہ رکھنے والے مقام تک رسائی حاصل تھی۔
تحقیقاتی حکام کو اندرونی شخص کے ملوث ہونے کا شبہ بھی ہے، کیونکہ اس علاقے تک رسائی انتہائی محدود ہے۔ تاہم، ابھی تک کسی مخصوص شخص کے ملوث ہونے کی تصدیق نہیں ہوئی اور کوئی گرفتاری بھی سامنے نہیں آئی۔
حکام اس بات کا بھی پتہ لگا رہے ہیں کہ اتنے حساس فوجی علاقے سے ہتھیار سیکیورٹی حصار عبور کرکے باہر کیسے لے جائے گئے۔ چوری شدہ ہتھیاروں کی تلاش اور ملزمان کی شناخت کے لیے فوج اور پولیس کی مشترکہ تحقیقات جاری ہیں۔
