انڈونیشیا میں 6.8 شدت کا زلزلہ، عوام خوف زدہ

جکارتہ: انڈونیشیا کا تلاؤد جزیرا 6.8 شدت کے زلزلے سے لرز اُٹھا، جس کے بعد مقامی حکام نے متاثرہ علاقوں میں ہنگامی اقدامات شروع کر دیئے گئے۔

بین الاقوامی خبر رساں ادارے کی رپورٹ کے مطابق انڈونیشیا کے تلاؤد جزیرے میں زلزلے کے باعث شہریوں میں خوف و ہراس پھیل گیا اور لوگ گھروں سے باہر نکل آئے۔

رپورٹس کے مطابق زلزلے سے تاحال کسی جانی نقصان یا بڑے پیمانے پر تباہی کی اطلاع سامنے نہیں آئی، ریسکیو اور امدادی ادارے صورتحال کا جائزہ لے رہے ہیں جبکہ متاثرہ علاقوں میں نگرانی کا عمل شروع کردیا گیا ہے۔

جرمن ریسرچ سینٹر فار جیو سائنسز (جی ایف زیڈ) کا اس حوالے سے کہنا ہے کہ زلزلہ تلاؤد جزائر کے ساحل کے قریب آیا۔ جس کی شدت 6.8 ریکارڈ کی گئی جبکہ اس کی گہرائی 77 کلو میٹر ہے۔

انڈونیشیا کے زلزلہ پیما مرکز کے مطابق زلزلے کی شدت 7.1 تھی اور اس کی گہرائی 17 کلو میٹر ریکارڈ کی گئی۔ تاہم حکام نے واضح کیا ہے کہ زلزلے کے باعث سونامی کا کوئی امکان نہیں ہے۔

حکام نے بتایا کہ احتیاطی تدابیر کے طور پر متاثرہ علاقوں میں سیکیورٹی اور امدادی ٹیموں کو الرٹ کردیا گیا ہے۔