قطر میں دس ماہ سے کوما میں رہنے والے تلنگانہ کے ایک شخص کو حیدرآباد لایاگیا

حیدرآباد (یو این آئی)قطر میں دس ماہ سے کوما میں رہنے والے ضلع نظام آبادکے شخص کو حیدرآباد واپس لایاگیا جہاں کے ایک پرائیویٹ ہاسپٹل میں وہ زیرعلاج ہیں۔

اس کے ارکان خاندان نے چیف منسٹر ریونت ریڈی سے خواہش کی کہ اس کے علاج کے اخراج حکومت برداشت کرے کیونکہ اس کا خاندان پرائیویٹ اسپتال میں ہونے والے علاج کے اخراجات کا متحمل نہیں ہے۔

اس شخص کی شناخت ضلع کے ناگم پیٹ کے رہنے والے سائنا کے طورپر کی گئی ہے جو دس ماہ سے زیادہ عرصہ سے قطر کے ایک اسپتال میں کوما میں تھا،اس کو کمپنی انتظامیہ نے جمعہ کو حیدرآباد کے پرائیویٹ اسپتال منتقل کیا۔

اس کی بیوی پریملا، بیٹے وکا س نے چیف منسٹر ریونت ریڈی اوربالکنڈہ کے کانگریس انچارج سنیل ریڈی سے خواہش کی کہ سائنا کو نظامس انسٹی ٹیوٹ آف میڈیکل سائنسس(نمس) منتقل کیاجائے جہاں اس کو علاج کی مفت سہولت فراہم کی جائے۔

کانگریس این آر آئی سیل کے کنوینرایم بھیم ریڈی کوما کے مریض کو قطر سے ہندوستان نکالنے اور نمس میں اس کے داخلے کے عمل کے سلسلہ میں تال میل کررہے ہیں۔