ترکی میں ہولناک حادثہ، سات افراد جاں بحق

انقرہ: ترکی میں ایک ہولناک سڑک حادثے میں 7 افراد جاں بحق ہو گئے۔

تفصیلات کے مطابق ترکی کے صوبے أغرے میں ٹرک اور مسافر بس میں تصادم کے نتیجے میں 7 افراد جاں بحق ہو گئے۔ ترک حکام کے مطابق بس کے ٹرک سے ٹکرانے کے نتیجے میں بس میں خوفناک آگ بھڑک اٹھی، اس حادثے میں 11 افراد زخمی بھی ہوئے ہیں۔

ترکی کے وزیر صحت نے بتایا کہ حادثہ پیر کو توتک میں پیش آیا، جو ایران اور آرمینیا کی سرحدوں کے قریب واقع ہے۔ رپورٹس کے مطابق مسافر بس جس ٹرک سے ٹکرائی تھی، اس میں گیسولین کی ترسیل کی جا رہی تھی۔

بتایا جاتا ہے کہ ایک ڈھلان اترتے ہوئے بس کے بریک نے کام کرنا چھوڑ دیا تھا اور بس بے قابو ہو کر ٹرک سے ٹکرا گئی۔ ترک صدر رجب طیب اردوان نے حادثہ پر افسوس کا اظہار کرتے ہوئے مرحومین کے لئے دعائے مغفرت کی۔