ہارن مارنے پر برہمی، بائیک سوار نے دوستوں کے ساتھ مل کر آرٹی سی ڈرائیور کی پٹائی کردی

حیدرآباد: ہارن مارنے پر شدید برہم بائیک سوار نے اپنے دوستوں کے ساتھ مل کر آرٹی سی بس کو روک کر ڈرائیور پر حملہ کردیا جس کے نتیجہ میں ڈرائیور زخمی ہوگیا۔

یہ واقعہ آندھراپردیش کے نیلور ضلع کے کاولی میں پیش آیا۔ بس میں سوار ایک مسافر اس واقعہ کی ویڈیو بنا رہا تھا۔اس کا فون چھین کر اس کو نقصان پہنچایاگیا۔

تفصیلات کے مطابق وجئے واڑہ ڈپو کی آر ٹی سی بس کاولی سے وجئے واڑہ جا رہی تھی۔ بس ڈرائیور نے بس کے سامنے بائیک ہونے پر ہارن بجایا۔

اس پر برہم بائیک سوار نے بس کو رکوایا اور ڈرائیورسے الجھ پڑا۔ پولیس نے اس موقع پر مداخلت کی اوردونوں کے جذبات کو سرد کئے تاہم کچھ دیر بعد بائیک سوار نے اپنے دوستوں کو طلب کرتے ہوئے بس کو رکوایا اور ڈرائیور کو نیچے اتار کر اس کی پٹائی کردی۔اس واقعہ میں ڈرائیور زخمی ہوگیا۔