جیہ پردہ کی گرفتاری کا حکم

رامپور: رامپور کی سابق ایم پی اور فلم اداکارہ جیہ پردہ ضابطہ اخلاق کی خلاف ورزی کے دو معاملوں میں پیر کو بھی خصوصی عدالت میں پیش نہیں ہوئیں جس کے بعد عدالت نے انہیں گرفتارکرکے حاضر کرنے کی ہدایت پولیس انتظامیہ کو دی ہے۔

عدالت نے اس کے ساتھ ہی اداکارہ کی ضمانت دینے والوں کو بھی نوٹس جاری کیا ہے۔ جیہ پردہ کے خلاف پانچ بار غیر ضمانتی وارنٹ جاری ہوچکے ہیں۔ ایم پی ایم ایل اے کورٹ میں آج پھر سماعت ہوئی۔ سماعت کے دوران جیہ پردہ آج بھی تاریخ پر حاضر نہیں ہوئیں۔ جیہ پردہ پر سال 2019 میں ضابطہ اخلاق کی خلاف ورزی کے دو معاملے زیر غور ہیں۔

جیہ پردہ نے 19 اپریل 2019 کو ضلع کے سوار تھانے کے گاؤں نور پور میں ایک سڑک کا افتتاح کیا تھا۔ اس کی ویڈیو بھی وائرل ہوئی تھی۔ اس کی بنیاد پر فلائنگ اسکواڈ ٹیم مجسٹریٹ -34 سوار ڈاکٹر نیرج کمار پاراشاری نے ضابطہ اخلاق کی خلاف ورزی کا مقدمہ درج کرایاتھا۔

تحقیقات کے بعد پولیس نے اس معاملے میں عدالت میں چارج شیٹ داخل کر دی ہے۔ اس کے بعد سے ایم پی-ایم پی ایل کورٹ (مجسٹریٹ ٹرائل) میں کیس کی سماعت مسلسل جاری ہے۔ آج جیہ پردہ کو اس معاملے میں آکر اپنا بیان ریکارڈ کرانا تھا۔جیہ کے خلاف سال 2019 کے لوک سبھا انتخابات کے دوران ہی دوسرا معاملہ بھی درج کیا گیا تھا۔

انہوں نے بی جے پی کے ٹکٹ پر ایس پی کے سینئر رہنما اعظم خاں کے خلاف الیکشن لڑا تھا۔ اس الیکشن میں انہیں ہار کا سامنا کرنا پڑ تھا۔ دوسرا مقدمہ کیمری تھانے میں درج کیا گیا تھا۔ اس مقدمے میں ان پر الزام ہے کہ انہوں نے پپلیا مشر گاؤں میں منعقد عوامی ریلی میں قابل اعتراض تبصرہ کیا تھا۔

جیہ کے وکیل سندیپ سکسینا نے بتایا کہ آج سپریم کورٹ کے وکیل اصغر خان مقامی عدالت پہنچے ۔اصغر خان نے دونوں معاملوں میں ریکال کے لئے عرضی داخل کی۔ لیٹر میں میڈیکل بیک گراونڈ کی بنیاد پر درخواست کی گئی ہے۔ لیکن عدالت نے عرضی خارج کرتے ہوئے ایس پی رامپور کو حکم دیا ہے۔ آرڈر میں جیہ پردہ کو عدالت میں پیش کرنے کو کہا گیا ہے۔