آندھراپردیش کے اننت پور میں برڈ فلو کی دستک، کئی ہزار مرخیوں کی موت

وشاکھاپٹنم: آندھرا پردیش کے اننت پور ضلع میں برڈ فلو کی تصدیق کے بعد تشویش کی صورتحال پیدا ہو گئی ہے۔ بکارایاسمدرم منڈل کے سدارم پورم گاؤں میں ایک پولٹری فارم میں گزشتہ چند دنوں کے دوران تقریباً ڈھائی ہزار مرغیوں کی اچانک موت کے بعد حکام نے فوری طور پر کارروائی شروع کر دی ہے۔

پولٹری فارم میں بڑی تعداد میں مرغیوں کی موت کے بعد محکمہ افزائشِ مویشیاں کے عہدیداروں نے نمونے جمع کیے اور انہیں مزید جانچ کے لیے بھوپال کے نیشنل انسٹی ٹیوٹ آف ہائی سیکیورٹی اینیمل ڈیزیز بھیجا۔ جانچ کے بعد ان نمونوں میں برڈ فلو وائرس کی تصدیق ہوئی۔

وائرس کی تصدیق ہوتے ہی ضلعی انتظامیہ نے احتیاطی اقدامات تیز کر دیے۔ برڈ فلو کے ممکنہ پھیلاؤ کو روکنے کے لیے سدارم پورم گاؤں کے اطراف 10 کلومیٹر کے علاقے کو محتاط علاقہ قرار دیا گیا ہے۔

متاثرہ پولٹری فارم کو فوری طور پر اپنی نگرانی میں لیتے ہوئے ضروری کارروائی شروع کی گئی ہے۔ مویشی پالن، محکمہ صحت، ریونیو اور پولیس کے عہدیداروں نے مشترکہ طور پر متاثرہ علاقے کا معائنہ کیا اور صورتحال کا جائزہ لیا۔

انتظامیہ نے مقامی شہریوں سے بھی احتیاط برتنے کی اپیل کی ہے۔ عوام کو ہدایت دی گئی ہے کہ مرغیوں یا چکن کے باقیات کو کھلے عام، سڑکوں کے کنارے یا غیر مقررہ مقامات پر نہ پھینکیں، تاکہ وائرس کے ممکنہ پھیلاؤ کو روکا جا سکے۔

برڈ فلو کی تصدیق کے بعد متاثرہ علاقے میں مرغیوں کی نقل و حرکت اور دیگر متعلقہ سرگرمیوں پر بھی نگرانی سخت کر دی گئی ہے۔ حکام کی جانب سے صورتحال پر مسلسل نظر رکھی جا رہی ہے اور بیماری کو مزید پھیلنے سے روکنے کے لیے احتیاطی اقدامات کیے جا رہے ہیں۔

پولٹری فارم میں بڑی تعداد میں مرغیوں کی اچانک موت اور اس کے بعد برڈ فلو کی تصدیق سے مقامی پولٹری فارم مالکان میں بھی تشویش پائی جا رہی ہے۔ انتظامیہ نے عوام سے اپیل کی ہے کہ وہ افواہوں پر توجہ نہ دیں اور سرکاری حکام کی جانب سے جاری کی جانے والی احتیاطی ہدایات پر عمل کریں۔

فی الحال حکام متاثرہ فارم اور اس کے آس پاس کے علاقوں کی نگرانی کر رہے ہیں، جبکہ برڈ فلو کے مزید ممکنہ پھیلاؤ کو روکنے کے لیے متعلقہ محکمے مشترکہ طور پر اقدامات کر رہے ہیں۔