وزیراعلی جوزف وجئے نے پلس پولیو مہم کا کیا افتتاح

چنئی: تمل ناڈو کے وزیر اعلیٰ سی جوزف وجئے نے اتوار کو قومی پلس پولیو حفاظتی ٹیکہ کاری پروگرام کے تحت ریاست گیر پولیو ٹیکہ کاری مہم کا آغاز کیا۔

ریاست کو دو دہائیوں سے زیادہ عرصے سے پولیو سے پاک رکھنے کی اس مہم میں صفر سے پانچ سال کے 52.91 لاکھ بچوں کو شامل کیا جائے گا۔

مسٹر وجئے نے چنئی کے پالوّکم میں واقع آدی دراوڑ کلیان ہائر سیکنڈری اسکول کیمپس سے اس مہم کا آغاز کیا۔ یہاں پانچ سال سے کم عمر کے بچوں کو پولیو ویکسین کی خوراک پلائی گئی۔ محکمہ صحت اور خاندانی بہبود نے تمام اہل بچوں کی ٹیکہ کاری کو یقینی بنانے کے لیے وسیع انتظامات کیے ہیں۔

پوری ریاست میں کل 43,051 ٹیکہ کاری مراکز بنائے جائیں گے۔ ان میں سرکاری پرائمری ہیلتھ سینٹرز، سرکاری ہسپتال، آنگن واڑی مراکز، اسکول اور دیگر اہم عوامی مقامات شامل ہیں۔

حکام نے واضح کیا ہے کہ اگر بچوں کو قومی ٹیکہ کاری پروگرام کے تحت پہلے بھی پولیو کا ٹیکہ لگ چکا ہے تب بھی انہیں آج کے دن دوبارہ یہ خوراک دی جانی چاہیے۔ ریاست کے تمام ٹیکہ کاری مراکز 28 جون کو صبح سات بجے سے شام پانچ بجے تک کام کریں گے۔

اس بڑے پیمانے کی مہم کے لیے دو لاکھ سے زیادہ صحت کارکنوں، آنگن واڑی ملازمین، اساتذہ اور رضاکاروں کو لگایا گیا ہے۔ تمل ناڈو حکومت نے تمام والدین سے اس اہم موقع کا فائدہ اٹھانے اور اپنے بچوں کو زندگی بچانے والی پولیو ویکسین پلانا یقینی بنانے کی اپیل کی ہے۔