چیف منسٹر ریونت ریڈی نے ایس آئی آر فارم پُر کیا، عوام سے ووٹر تصدیق کا عمل مکمل کرنے کی اپیل

حیدرآباد: تلنگانہ میں جاری اسپیشل انٹینسیو ریویژن (SIR) کے تحت ووٹر لسٹوں کی خصوصی نظرِ ثانی کا عمل تیزی سے جاری ہے۔ اس سلسلے میں وزیرِ اعلیٰ اے ریونت ریڈی نے خود اپنا SIR فارم پُر کرکے بوتھ لیول آفیسرز (BLOs) کے حوالے کیا۔

اس موقع پر وزیرِ اعلیٰ نے ریاست کے تمام اہل ووٹروں سے اپیل کی کہ وہ بروقت اپنے ووٹر کی تفصیلات کی تصدیق کرائیں اور SIR کے عمل کو ہرگز نظر انداز نہ کریں۔

انہوں نے کہا کہ اگر کوئی شہری اس عمل میں حصہ نہیں لیتا یا اپنی معلومات کی تصدیق نہیں کراتا، تو اس کا نام ووٹر لسٹ سے خارج ہونے کا امکان پیدا ہو سکتا ہے۔

ریونت ریڈی نے عوامی نمائندوں، منتخب اراکین اور مقامی رہنماؤں سے بھی اپیل کی کہ وہ اپنے اپنے علاقوں میں لوگوں کو SIR کے بارے میں آگاہ کریں اور ہر اہل ووٹر کو فارم بھرنے اور تصدیقی عمل مکمل کرنے میں تعاون فراہم کریں۔

وزیرِ اعلیٰ نے اس بات پر زور دیا کہ درست اور شفاف ووٹر لسٹ جمہوری نظام کی بنیاد ہے، اس لیے ہر شہری کی ذمہ داری ہے کہ وہ اپنے ووٹ کے حق کے تحفظ کے لیے SIR کا عمل بروقت مکمل کرے۔