دہلی شراب اسکام: کویتا کا سابق سی اے گرفتار

حیدرآباد: دہلی شراب پالیسی معاملہ میں جاری جانچ کے حصہ کے طورپر سی بی آئی نے بدھ کو حیدرآباد کے چارٹرڈاکاونٹنٹ (سی اے) بُچی بابوگورنٹلہ کو دہلی شراب پالیسی کی تیاری اور اس پر عمل کے سلسلہ میں ان کے مبینہ رول پر گرفتار کرلیا۔

بابو، تلنگانہ کی حکمران جماعت بی آرایس کی رکن قانون ساز کونسل کے کویتا کے سابق سی اے رہے ہیں۔جانچ ایجنسی نے بابو کو دہلی شراب پالیسی کی تیاری اور اس پر عمل کرتے ہوئے حیدرآباد کی ہول سیل اور رٹیل لائسنس رکھنے والوں اور ان کے مالکین کو غلط طریقہ سے فائدہ پہنچانے کا الزام لگایا ہے۔

گذشتہ سال دسمبر میں سی بی آئی نے مبینہ دہلی شراب گھوٹالے میں کویتا سے حیدرآباد میں پوچھ گچھ کی تھی۔مرکزی ایجنسی نے اس معاملہ میں گذشتہ سال نومبر میں سات ملزمین کے خلاف پہلی چارج شیٹ داخل کی تھی۔