جنوری 2024 کے پہلے ہفتہ میں کانگریس کی حکومت قائم ہوجائے گی: ریونت ریڈی

حیدرآباد: تلنگانہ کانگریس کے سربراہ ریونت ریڈی نے یقین ظاہر کیا کہ جنوری 2024 کے پہلے ہفتہ میں ریاست میں کانگریس کی حکومت قائم ہو جائے گی۔ انہوں نے کہا کہ کانگریس کی حکومت بننے کے بعد سب سے پہلے دستخط پوڈو اراضیات کے مسئلہ کو حل کرنے کے لئے ہوں گے۔

ریاست کے جنگلات کے علاقوں میں بڑے پیمانہ پر ان پوڈو اراضیات پر قبائلی، کاشت کرتے ہیں۔ ریونت ریڈی نے کہا کہ چندرشیکھرراو حکومت کے دن قریب ہیں، وہ مقدمات سے ڈرنے والے نہیں ہیں۔ انہوں نے کہا کہ چندرشیکھرراو مخالف تمام طاقتوں کو متحدہوکر کانگریس کی حمایت کرنی چاہئے۔

انہوں نے الزام لگایا کہ تلنگانہ کے غداروں کو کابینہ میں 90 فیصد عہدے دیئے گئے ہیں۔ انہوں نے کانگریس پارٹی سے جیت کر حکمراں پارٹی میں شامل ہونے والے 12 ایم ایل اے کے خلاف سی بی آئی تحقیقات کا مطالبہ کیا۔

ریونت ریڈی نے ریاست میں 3,000 شراب کی دکانیں قائم کرنے پر وزیراعلی پر تنقید کی۔ انہوں نے خدشہ ظاہر کیا کہ اب تک قرضہ معاف نہ ہونے کی وجہ سے کسان مقروض ہیں۔