گائے کو قومی جانور قراردینے کا مطالبہ، بی جے پی دفتر کے گھیراؤ کی کوشش

حیدرآباد: گائے کو قومی جانور قراردینے کا مطالبہ کرتے ہوئے ےُگا تلسی فاؤنڈیشن کے چیئرمین شیوکمار کی قیادت میں حیدرآباد میں بی جے پی کے دفتر کا گھیراؤ کرنے کی کوشش کی گئی۔ شیوکمار نے 14 فروری کو کاؤ ہگ ڈے کے طور پر منانے اور اس فیصلہ کو واپس لینے پر مرکزی حکومت پر شدید نکتہ چینی کی۔

 نامپلی میں واقع بی جے پی کے دفتر کا گھیراؤ کرنے کے لیے منٹ کمپاؤنڈ میں ترشکتی ہنومان مندر سے نکلنے والے ان افراد کو پولیس نے روک دیا۔ جب انہوں نے پولیس کی رکاوٹوں کو توڑ کر آگے بڑھنے کی کوشش کی تو پولیس اور احتجاجیوں کے درمیان بحث وتکرار ہوئی۔

 بعد ازاں پولے نے شیوکمار اور دیگر احتجاجیوں کو حراست میں لے کر پولیس اسٹیشن منتقل کردیا۔ شیوکمار نے اس موقع پر گائے کی اموات پر توجہ نہ دینے پر مرکزی اور ریاستی حکومتوں پر تنقید کی۔

ان کا کہنا تھا کہ بی جے پی اقتدار کے لیے ہندوتوا کی آڑ میں سیاست کر رہی ہے۔ شیوا کمار نے واضح کیا کہ گائے کو قومی جانور قرار دینے تک تحریک جاری رہے گی۔