کے سی آر کو پریشان کرنے ای ڈی کاستعمال: بی آر ایس ایم ایل اے

حیدرآباد: بی آر ایس کے ارکان اسمبلی نے ایم ایل سی کویتا کو دہلی شراب معاملہ میں پریشان کرنے کا الزام لگایا۔بی آر ایس لیڈروں نے کویتا کے ساتھ پوچھ گچھ اور مرکزی ایجنسی کے رویہ کو بدنیتی پر مبنی حرکت قرار دیا۔ انہوں نے کہا کہ صرف چیف منسٹر کے چندرشیکھرراو کو پریشان کرنے کے لیے مرکزی حکومت ای ڈی کا استعمال کررہی ہے۔

 رکن اسمبلی روی شنکر نے الزام لگایا کہ تلنگانہ کے عوام نے بی آر ایس لیڈروں بالخصوص چندرشیکھرراوکے خاندان کا ساتھ دیا ہے۔ انہوں نے کہا کہ بی جے پی ای ڈی کے چھاپے مار کر ریاست تلنگانہ پر قبضہ کرنے کی کوشش کر رہی ہے۔

 انہوں نے پوچھا کہ ای ڈی نے بی جے پی لیڈروں اوراڈانی کے مکانات پر کیوں چھاپے نہیں مارے جنہوں نے عوام کا پیسہ لوٹا۔ انہوں نے واضح کیا کہ وہ کسی بھی حالت میں کویتا کا ساتھ دیں گے۔

رکن اسمبلی جی بالاراجو نے کہا کہ جب سے ٹی آر ایس پارٹی بی آر ایس میں تبدیل ہوئی ہے سی بی آئی اور ای ڈی خاص طور پر چندرشیکھرراوکی دختر ایم ایل سی کویتا کو پریشان کررہے ہیں۔ انہوں نے الزام لگایا کہ کویتا نے کوئی اسکام نہیں کیا ہے۔

 انہوں نے کہا کہ چندرشیکھرراو کو تلنگانہ تک محدود کرنے کی سازشیں کی جارہی ہیں جو ملک کے اقدار کے تحفظ کے نعرے کے ساتھ آگے بڑھ رہے ہیں۔ انہوں نے کہا کہ اگر تلنگانہ میں نافذ نظام حکومت کو ملک میں متعارف کرایا جاتا ہے تو مرکزی حکومت کے وجود کو خطرہ لاحق ہو جائے گا۔

 اس لیے بی جے پی حکومت اپنے شیطانی خیالات کے ساتھ جمہوریت کو ختم کرنے کے مقصد سے کام کر رہی ہے۔ انہوں نے تمام جمہوریت پسندوں پر زور دیا کہ وہ اس وقت تک متحد ہوجائیں جب تک مودی حکومت ختم نہیں ہوجاتی۔

 انہوں نے تنقید کی کہ ای ڈی اور سی بی آئی جیسے ادارے جنہیں خود مختاری سے کام کرنا چاہیے، مرکزی حکومت کی ہدایت کے مطابق کام کررہے ہیں۔ انہوں نے جمہوریت کے تحفظ کے لیے کام کرنے والے رہنماؤں سے مطالبہ کیا کہ وہ اس حکومت کا خاتمہ کریں جو اس طرح کے حملوں کی مرتکب ہے۔

رکن اسمبلی سنجے کمار نے تنقید کرتے ہوئے کہا کہ مودی کے دور حکومت میں ملک کا تمام نظام بدعنوان ہو گیا ہے۔ انہوں نے بی جے پی پر ایم ایل سی کویتا کے خلاف سازشی سیاست کرنے کا الزام لگایا۔ انہوں نے کہا کہ بی جے پی چندرشیکھرراو کی عزت نفس کو نقصان پہنچانے کی سازش کر رہی ہے۔