حیدرآباد میں گیارھویں شریف کے جلوس کے دوران ہاتھی بے قابو، عقیدت مندوں میں خوف و ہراس

حیدرآباد: شہر کے ایرانی گلی علاقے میں گیارھویں شریف کے جلوس کے دوران ایک ہاتھی کے اچانک بے قابو ہوجانے سے عقیدت مندوں میں خوف و ہراس پھیل گیا۔ صورتحال کو دیکھتے ہوئے پولیس نے فوری طور پر جلوس روک دیا اور احتیاطی اقدامات کیے۔

ڈی سی پی چارمینار زون کھارے کرن پربھاکر کے مطابق جلوس کے دوران ہاتھی کی حرکتیں غیر معمولی ہوگئی تھیں، جس پر پولیس نے فوری کارروائی کرتے ہوئے جلوس کو روک دیا تاکہ کسی ناخوشگوار واقعہ سے بچا جاسکے۔

مہاوت، محکمہ جنگلات کے عہدیداروں اور پولیس نے صورتحال کا جائزہ لیا۔ باہمی مشاورت کے بعد فیصلہ کیا گیا کہ ہاتھی کو جلوس میں مزید آگے نہیں لے جایا جائے گا۔

بعد ازاں ہاتھی کو بحفاظت ایک محفوظ مقام پر منتقل کردیا گیا۔ مہاوت، محکمہ جنگلات کے عملے اور پولیس کی بروقت مداخلت سے ایک بڑے حادثے کو ٹالنے میں کامیابی ملی۔

اس واقعہ کے دوران جلوس میں شریک عقیدت مندوں اور مقامی افراد میں تشویش دیکھی گئی، تاہم حکام کی فوری کارروائی سے صورتحال پر قابو پالیا گیا۔