فیفاورلڈ کپ: کیا مراکش کا ناقابل تسخیر دفاع اُسے فیفا چمپئن بنا سکتا ہے؟

دوحہ: غیر یقینی صورتحال اور اتار چڑھاؤ سے بھرے 2022 فیفا ورلڈ کپ میں مراکش کی کارکردگی نے فٹ بال شائقین کو سب سے زیادہ حیران کیا ہے۔ مراکش نہ صرف ورلڈ کپ کے سیمی فائنل میں پہنچنے والی پہلی افریقی ٹیم تھی بلکہ اس نے اپنی شاندار مہم میں حریف ٹیم کے کسی کھلاڑی کو بھی اپنے خلاف گول کرنے نہیں دیا۔

کینیڈا کے ساتھ میچ میں بھی مراکش کے خلاف جو گول ہوا تھا، خود مراکشی کھلاڑی نائف ایگارڈ کی غلطی کے باعث ہوا تھا۔ یہی ایک واحد گول ہے جو پورے ورلڈ کپ میں مراکش کے خلاف ہوا ہے۔ ورنہ کسی بھی میچ میں مراکش کے خلاف اب تک کوئی گول نہیں کیا جاسکا ہے۔

اگر مراکش، جس نے بیلجیئم اور اسپین جیسی بڑی ٹیموں کو شکست دی، آج فٹ بال کا سب سے بڑا ٹورنامنٹ جیتنے کا دعویدار ہے تو بلاشبہ اس کا سہرا اس کے دفاع کو جاتا ہے۔

مراکش کے کوچ ولید رگراگوئی نے انہیں ایک مضبوط دفاعی یونٹ بنایا ہے۔ اسپین کے خلاف سوپر 16 کے میچ میں مراکش گیند پر صرف 23 فیصد قبضہ رکھ پایا تھا لیکن پھر بھی میچ ان کے حق میں گیا۔ 73 فیصد گیند رکھنے کے باوجود اسپین صرف دو بار ہدف کو نشانہ بنا سکا۔

پرتگال کے خلاف کوارٹر فائنل میں مراکش کا کھیل بھی زیادہ جارحانہ نہیں تھا لیکن ناقابل تسخیر دفاع اور يوسف النصيري کا ابتدائی گول ان کی جیت کے لیے کافی رہا۔

مراکش کی ورلڈ کپ مہم سے پہلے، تاہم، ان کے اتحاد پر بہت سے سوالات اٹھائے جا رہے تھے۔ کوچ ولید کے 26 رکنی اسکواڈ میں صرف 12 کھلاڑی مراکشی نژاد تھے جبکہ باقی 14 مختلف یورپی ممالک سے اپنے وطن کے لیے کھیلنے آئے تھے۔ اسپین کو شکست دینے کے بعد مراکش کے کوچ نے کہا کہ ہماری ٹیم نے ورلڈ کپ میں ایک فیملی کی طرح اپنا سب کچھ داؤ پر لگا دیا ہے۔

کوچ نے کہا کہ ورلڈ کپ سے پہلے کچھ لوگوں نے یورپ میں پیدا ہونے والے کھلاڑیوں پر سوالات اٹھائے تھے، آج انہوں نے ثابت کیا کہ مراکش کا ہر کھلاڑی جس کے پاس مراکش کا پاسپورٹ ہے وہ مراکش کا باشندہ ہے۔ میں خود فرانس میں پیدا ہوا ہوں، لیکن کوئی بھی اپنے ملک سے میری محبت پر شبہ نہیں کر سکتا۔

کوچ ولید رگراگوئی نے پرتگال کے خلاف جیت کے بعد کہا کہ مراکش سلویسٹر اسٹالون کی اداکاری والی فلم ’’راکی‘’ کے مرکزی کردار کی طرح ہے، جو بہترین ٹیم کو ہرانا جانتے ہیں۔