صحرائی راستے سے مکہ مکرمہ میں داخل ہونے کی کوشش، 5 افراد گرفتار

مکہ مکرمہ: سعودی عرب میں حج سیکیورٹی فورسز نے حج ضوابط کی خلاف ورزی کرتے ہوئے غیر قانونی طور پر صحرائی راستے سے مکہ مکرمہ میں داخل ہونے کی کوشش کرنے والے 5 افراد کو گرفتار کر لیا ہے۔

سعودی خبر رساں ادارے کی رپورٹ کے مطابق حکام کا کہنا ہے کہ گرفتار کیے گئے افراد میں ایک سعودی شہری، دو مصری اور دو یمنی باشندے شامل ہیں۔

سیکیورٹی فورسز نے ان افراد کو اس وقت حراست میں لیا جب وہ بغیر حج پرمٹ کے صحرائی راستے سے پیدل مکہ مکرمہ میں داخل ہونے کی کوشش کر رہے تھے۔ تمام ملزمان کو حراست میں لے کر ان کے خلاف قانونی کارروائی کا آغاز کر دیا گیا ہے۔

محکمہ پبلک سیکیورٹی نے تمام شہریوں اور مقیم غیر ملکیوں پر زور دیا ہے کہ وہ حج کے ضوابط اور سرکاری ہدایات کی سختی سے پابندی کریں۔