پیرو میں آگ لگنے سے پانچ افراد ہلاک

لیما: پیرو کے جنوبی علاقے اریکیپا میں پیر کی رات لگی زبردست آگ میں تین بچوں سمیت کم از کم پانچ افراد ہلاک اور ایک زخمی ہو گیا۔

مقامی افسران نے منگل کو بتایا کہ یہ آگ مقامی وقت کے مطابق رات 11 بجے کے قریب صوبہ کمانا کے سیکوچا میں کارلوس پورٹوکیریرو ڈونگو بستی میں لگی۔

انہوں نے بتایا کہ کافی مشقت کے بعد منگل کی صبح تک آگ پر قابو پالیا گیا۔ آگ نے 10 مکانات کو تباہ کر دیا اور 100 سے زائد افراد بے گھر ہو گئے۔

نجی نشریاتی ادارے ریڈیو پروگرامس ڈیل پیرو نے اریکیپا کے علاقائی ایمرجنسی آپریشن سینٹر کے سربراہ جوز بیریزوٹا کے حوالے سے بتایا کہ اب تک پانچ اموات کی تصدیق ہو چکی ہے۔

نیشنل ایمرجنسی آپریشن سینٹر کے مطابق’’آگ میں زخمی ہونے والے دیگر ایک شخص کا مقامی اسپتال میں علاج کیا جا رہا ہے۔

لا ری پبلکا اخبار کے مطابق ابتدائی تحقیقات سے پتہ چلتا ہے کہ آگ گھر میں شارٹ سرکٹ کے باعث لگی جس سے گھریلو گیس کا ٹینک پھٹ گیا اور آگ تیزی سے پھیل گئی۔ اخبار نے اطلاع دی ہے کہ آگ کی زد میں کئی مکانات آئے۔