جی ایس ٹی میں کمی، تلنگانہ اور اے پی میں پٹاخوں کی قیمتیں گھٹ گئیں

حیدرآباد: دونوں تلگو ریاستوں تلنگانہ اوراے پی میں دیوالی کی آمد کے ساتھ ہی بازاروں میں زبردست گہما گہمی دیکھی جا رہی ہے۔ بچے ہوں یا بڑے، تمام اس تہوار کو جوش و خروش سے منانے کی تیاریوں میں مصروف ہیں۔

مقامی آتش بازی کی دکانیں خریداروں سے بھری پڑی ہیں اور رواں سال پٹاخوں کی قیمتیں نسبتاً مناسب سطح پر دیکھی جا رہی ہیں۔ تاجروں کا کہنا ہے کہ خام مال کی قیمتوں میں کمی اور جی ایس ٹی میں نرمی کی وجہ سے پٹاخوں کی قیمتوں میں نمایاں کمی آئی ہے، جس کا اثر صارفین کی خریداری پر صاف ظاہر ہو رہا ہے۔

پٹاخوں فروخت کرنے والے دکانداروں نے بتایا کہ گزشتہ برس کے مقابلے میں تارا، بم اور دیگر پٹاخوں کی قیمتیں تقریباً وہی ہیں جبکہ طلب میں 10 تا 15 فیصد اضافہ ہوا ہے۔

وشاکھاپٹنم اور وجے واڑہ کے کئی تاجروں کا کہنا ہے کہ بعض مقامات پر سامان کی سپلائی میں بھی رکاوٹ آئی ہے۔

تجارتی حلقوں کے مطابق اس سال دیوالی کے موقع پر فروخت کا رجحان گزشتہ سال کے مقابلہ میں بہتر ہے۔ قیمتوں میں استحکام، حکومت کی جی ایس ٹی پالیسی میں نرمی اور صارفین کے جوش و خروش نے مجموعی طور پر بازاروں کو زندگی بخشی ہے۔