بی جے پی کے دباؤ میں نہ آنے پرالیکشن کمشنر ارون گوئل کو میراسلام: ممتابنرجی

کولکتہ: الیکشن  کمشنر ارون گوئل کے استعفیٰ کے ایک دن بعد چیف منسٹر مغربی بنگال ممتابنرجی نے اتوار کے دن ان کی ستائش کی کہ وہ بی جے پی کے دباؤ میں نہیں آئے۔ انہوں نے زوردے کرکہا کہ آنے والے لوک سبھا الیکشن میں بھگوا کیمپ کو شکست ہوگی۔

کولکتہ کے بریگیڈپریڈگراؤنڈس میں میگاریالی سے خطاب میں ممتابنرجی نے کہا کہ ارون گوئل کا اچانک مستعفیٰ ہونا ثابت کرتا ہے کہ بی جے پی لوک سبھا الیکشن میں ووٹ لوٹنے کی کوشش کررہی ہے۔ انہوں نے کہا کہ میں بی جے پی کے دہلی قائدین کے دباؤ میں نہ آنے پر ارون گوئل کو سلام کرتی ہوں۔

 الیکشن کمشنر ارون گوئل ہفتہ کے دن مستعفیٰ ہوگئے۔ انہوں نے 2024ء کے لوک سبھا الیکشن کا شیڈول جاری ہونے سے چند دن پہلے عہدہ چھوڑدیا۔ ان کی میعاد 5 دسمبر2027ء تک تھی اور وہ آئندہ سال موجودہ چیف الیکشن کمشنر راجیو کمار کی سبکدوشی کے بعد چیف الیکشن کمشنر بننے والے تھے۔