حیدرآباد میں موسلادھار بارش، شہر کی اہم سڑکیں ندی نالوں کا منظر پیش کرنے لگی
شدید بارش کے باعث متعدد اہم شاہراہوں اور چوراہوں پر پانی جمع ہو گیا، جس کے نتیجے میں دفاتر سے گھروں کو واپس جانے والے شہریوں کو طویل ٹریفک جام کا سامنا کرنا پڑا۔ دو پہیہ گاڑی سواروں اور پیدل چلنے والوں کو بھی مشکلات کا سامنا ہے۔
حیدرآباد: شہر حیدرآباد میں منگل کی شام ہونے والی موسلادھار اور طوفانی بارش نے معمولاتِ زندگی کو بری طرح متاثر کر دیا۔ شہر کے مختلف علاقوں میں مسلسل بارش کے باعث سڑکیں زیرِ آب آ گئیں جبکہ کئی نشیبی علاقوں میں پانی جمع ہونے سے شہریوں کو شدید مشکلات کا سامنا کرنا پڑ رہا ہے۔
سائبرآباد کمشنریٹ کے حدود میں گچی باؤلی، مادھاپور، ہائی ٹیک سٹی اور اطراف کے علاقوں میں شدید بارش کے باعث ٹریفک کا نظام درہم برہم ہو گیا۔ سڑکوں پر گاڑیوں کی طویل قطاریں دیکھی گئیں جبکہ متعدد مقامات پر گھنٹوں تک ٹریفک جام کی صورتحال برقرار رہی۔
شہر کے مغربی علاقوں کے ساتھ ساتھ جوبلی ہلز، بنجارہ ہلز، فلم نگر، اپّل، ناگول، ایل بی نگر، ونستھلی پورم، ملکاجگیری، بہادرپورہ، عابڈس، ملک پیٹ، عنبرپیٹ، رامنتاپور، سرور نگر، سعید آباد، مشیر آباد، حمایت نگر اور عثمانیہ یونیورسٹی کے اطراف بھی شدید بارش ریکارڈ کی گئی۔
شدید بارش کے باعث متعدد اہم شاہراہوں اور چوراہوں پر پانی جمع ہو گیا، جس کے نتیجے میں دفاتر سے گھروں کو واپس جانے والے شہریوں کو طویل ٹریفک جام کا سامنا کرنا پڑا۔ دو پہیہ گاڑی سواروں اور پیدل چلنے والوں کو بھی مشکلات کا سامنا ہے۔
ٹریفک پولیس نے شہریوں کو احتیاطی تدابیر اختیار کرنے کا مشورہ دیتے ہوئے کہا ہے کہ بارش کے دوران گاڑیوں کی رفتار کم رکھی جائے، محفوظ فاصلہ برقرار رکھا جائے اور پانی سے بھرے ہوئے راستوں سے گزرنے سے گریز کیا جائے۔
محکمہ موسمیات کے مطابق آئندہ چند گھنٹوں کے دوران مزید بارش اور گرج چمک کے ساتھ بوندا باندی کا امکان برقرار ہے۔ انتظامیہ اور متعلقہ محکمے الرٹ پر ہیں جبکہ شہریوں سے غیر ضروری سفر سے اجتناب کرنے اور موسمی صورتحال کو مدنظر رکھتے ہوئے احتیاط برتنے کی اپیل کی گئی ہے۔
اگرچہ بارش کے باعث موسم خوشگوار ہو گیا ہے، تاہم شہر کے مختلف علاقوں میں پانی جمع ہونے اور ٹریفک کی مشکلات نے شہریوں کی روزمرہ زندگی کو متاثر کر دیا ہے۔
