زیارت کیلئے آنے والے زائرین کیلئے اہم خبر، حطیم میں نوافل کی ادائیگی کیلئے مخصوص اوقات مقرر

جدہ: سعودی عرب نے مکہ مکرمہ میں خانہ کعبہ کی حدود حطیم میں نوافل کی ادائیگی کے لیے اوقات مقرر کرنے کا فیصلہ کیا ہے۔ سعودی خبر رساں ادارے کے مطابق، اب حطیم میں خواتین کے لیے نوافل ادا کرنے کا وقت رات 8 بجے سے صبح 2 بجے تک ہوگا، جبکہ مرد حضرات صبح 8 بجے سے 11 بجے تک نوافل ادا کر سکیں گے۔

انتظامیہ نے وضاحت کی ہے کہ زائرین کو حطیم میں داخلہ مغربی دروازے سے دیا جائے گا اور ہر زائر کو 10 منٹ کا وقت ملے گا۔ اس فیصلے کا مقصد رش کو کنٹرول میں رکھنا اور زائرین کو سہولت فراہم کرنا ہے۔

مزید برآں، حرمین شریفین کی انتظامیہ نے زائرین کے سامان کی حفاظت کے لیے ’لاکرز‘ پروگرام کا نیا منصوبہ متعارف کروانے کی تیاریاں شروع کر دی ہیں۔ حرمین اتھارٹی کے مطابق، اس منصوبے کا مقصد سعودی ویژن 2030 کے اہداف کو مدنظر رکھتے ہوئے زائرین کو بہترین سہولت فراہم کرنا ہے۔

لاکرز پروگرام سے زائرین کو یہ سہولت حاصل ہوگی کہ وہ اپنا سامان محفوظ طریقے سے رکھ کر اطمینان سے مسجد الحرام یا مسجد نبوی صلی اللہ علیہ وآلہ وسلم میں عبادات میں مشغول ہو سکیں۔