اسرائیل نے شام اور لبنان کی سرحدی گزرگاہ کو نشانہ بنایا

دمشق: اسرائیلی جنگی طیاروں نے بدھ کی آدھی رات کے بعد شام اور لبنان کے درمیان 10 سرکاری اور غیر سرکاری سرحدی گزرگاہوں کو نشانہ بناتے ہوئے فضائی حملے کیے، جس میں چھ افراد ہلاک اور 15 سے زیادہ زخمی ہوئے۔

شام کے سرکاری میڈیا اور مانیٹرنگ گروپوں نے یہ اطلاع دی۔

برطانیہ میں قائم سیریئن آبزرویٹری فار ہیومن رائٹس نے کہا کہ اسرائیلی طیاروں نے سب سے پہلے شمال مغربی صوبے طرطوس کے دیہی علاقوں میں العريضةکے ساتھ ساتھ وسطی صوبے حمص کے دیہی علاقوں کو نشانہ بنایا۔

مانیٹرنگ گروپ کے مطابق حمص کے دیہی علاقے میں وادی خالد میں غیر رسمی گزرگاہوں اور شام اور لبنان کو الگ کرنے والے دریائے الکبیر پر تین پلوں کو بھی نشانہ بنایا گیا۔

شام کے سرکاری ٹیلی ویژن نے اطلاع دی ہے کہ العريضةکراسنگ پر 18 افراد زخمی ہوئے ہیں جن میں سے تین کی حالت تشویشناک ہے۔