کے سی آر نے کسانوں کی آنکھ میں آنسوکے بجائے خوشی بھردی:ہریش راؤ
ہریش راؤ نے کہا ایک وقت تھا جب موسم خریف میں پانی کی قلت کی وجہ سے کسان زرعی سرگرمیاں شروع کرنے سے گریزکیا کرتے تھے۔ مگر آج صورتحال مکمل طورپر بدل چکی ہے۔کے سی آر کے اقدامات کی وجہ سے ریاست میں سبزانقلاب برپا ہواہے۔
حیدرآباد: ریاستی وزیر فینانس ٹی ہریش راؤ نے کہاکہ متحدہ آندھراپردیش میں کسانوں کی آنکھوں میں آنسوبہاکرتے تھے مگر گزشتہ آٹھ سالوں میں کے سی آر کی دوراندیش اور دانشمندانہ قیادت میں اختیارکردہ اقدامات کے باعث آج کسانوں کے آنکھوں سے خوشی چھلک رہی ہے۔
آج اسمبلی حلقہ دباک کے زلہ گڈا دیہات میں رکن پارلیمنٹ کے پربھاکر ریڈی کے ہمراہ تلنگانہ تلی کے مجسمہ کی نقاب کشائی کرنے کے بعد خطاب کرتے ہوئے ہریش راؤ نے کہاکہ کے سی آر کی دلچسپی کی وجہ سے آج ایک ایک انچ اراضی قابل کاشت بنی ہوئی ہے۔ کالیشورم پراجکٹ کے ذریعہ ہردیہات وقریہ کو کنالوں سے پانی فراہم کیاجا رہا ہے۔
کسانوں کی حوصلہ افزائی کیلئے رعیتوبیمہ اور رعیتوبندھواسکیم پر عمل کیا جارہا ہے۔ حکومت معیاری تخم اور کھاد فراہم کررہی ہے۔ ہریش راؤ نے کہا ایک وقت تھا جب موسم خریف میں پانی کی قلت کی وجہ سے کسان زرعی سرگرمیاں شروع کرنے سے گریزکیا کرتے تھے۔
مگر آج صورتحال مکمل طورپر بدل چکی ہے۔کے سی آر کے اقدامات کی وجہ سے ریاست میں سبزانقلاب برپا ہواہے۔ مایوس کسانوں کے چہروں پر خوشیاں کھیل رہی ہے جس کا سہراکے سی آر کے سرجاتاہے۔
