اے پی کے راجمندری میں پکڑاگیا شیر وشاکھاپٹنم زو منتقل

حیدرآباد: اے پی کے راجمندری میں پکڑے گئے شیر کو طبی نگرانی کے لئے وشاکھاپٹنم زو منتقل کر دیا گیا ہے۔

راجمندری اور اس کے گردونواح میں گزشتہ 17 دنوں سے یہ شیر دہشت پھیلا رہا تھا جس کو محکمہ جنگلات کے حکام نے کافی جدوجہد کے بعد کامیابی سے پکڑ کر وشاکھاپٹنم کے زو میں منتقل کر دیا۔ کئی گھنٹوں کی مشقت کے بعد ماہرین نے شیر کو بے ہوشی کا انجکشن لگا کر بحفاظت قابو کیا۔

وشاکھاپٹنم زو کے حکام کے مطابق شیر اس وقت اینیمل ریسکیو سنٹر میں زیرنگرانی ہے۔ ڈاکٹروں کا کہنا ہے کہ بے ہوشی کی دوا کا اثر ختم ہونے کے بعد وہ جسمانی طور پر بالکل صحت مند ہے تاہم پنجرے میں ہونے کی وجہ سے وہ تھوڑا غصہ اور وحشیانہ برتاؤ کر رہا ہے۔

ماہرین کا ماننا ہے کہ یہ شیر مہاراشٹر کے جنگلات سے یہاں پہنچا تھا۔ اسے فی الحال 45 دنوں تک ماہرِ حیاتیات اور ڈاکٹروں کی خصوصی نگرانی میں قرنطینہ میں رکھا جائے گا تاکہ اسے مناسب ماحول فراہم کیا جا سکے۔

مکمل طور پر بحال ہونے کے بعد حکام اس بات پر غور کریں گے کہ اسے دوبارہ جنگل میں چھوڑا جائے یا نہیں۔ اس کامیاب آپریشن کے بعد راجمندری کے مقامی افرادنے راحت کی سانس لی۔