تلنگانہ کی ترقی میں مسلمان سرگرم شراکت دار:ڈی شراون

حیدرآباد: تلنگانہ کی حکمران جماعت بی آرایس کے لیڈر ڈی شراون نے کہا ہے کہ تلنگانہ میں وہ دن گئے جب مسلم اقلیتوں کو سیاسی ووٹ بینک کے طورپر دیکھاجاتا تھا۔

وزیراعلی کے چندرشیکھرراو اور وزیر انفارمیشن ٹکنالوجی کے تارک راما راو کی ترقی پسند اور ہمدرد حکمرانی میں تلنگانہ کی ترقی میں مسلمان سرگرم شراکت دار ہیں۔

سوشیل میڈیا کے اہم پلیٹ فارم ایکس پر سرگرم شراون نے ٹوئیٹ کرتے ہوئے کہا کہ مسلم اقلیتوں کوخصوصی طورپر قائم کئے گئے اقامتی اسکولس میں نہ صرف معیاری تعلیم فراہم کی جارہی ہے بلکہ ان کو کاروباری صلاحیت کے ساتھ بااختیار بنانے کا کام بھی کیاجارہا ہے۔

اس تبدیلی کی روشن مثال وی ہب ہے جو مسلم خواتین کو کامیاب اور سرگرم کاروباری بنانے آگے بڑھانے کے لئے ان کو بااختیار بنارہا ہے۔

اس پوسٹ کے ساتھ شراون نے وزیر آئی ٹی تارک راما راو کا ویڈیو بھی پوسٹ کیا جس میں وہ مسلم خواتین سے بات کرتے ہوئے انٹرپرینرشپ کے بارے میں ان کے احساسات سے واقف ہورہے ہیں۔

وی ہب کے پراجکٹ اجاگر کے ذریعہ اقلیتی بہبود کے محکمہ کی معاشی اسکیم کے ذریعہ خاتون انٹرپرینرس کو فنڈس دیئے گئے ہیں۔وزیرتارک راما راو نے ان خواتین کو حکومت کی جانب سے ممکنہ مدد کی یقین دہانی بھی کروائی۔