کورونا ویکسین ٹیکنالوجی تیار کرنے والوں کو طب کا نوبیل انعام

اسٹاکہوم: ہنگری نژاد امریکی بایو کیمسٹ کیٹالین کریکو اور امریکی طبیب-سائنس دان ڈریو ویس مین کو کووڈ-19 ویکسین میں استعمال ہونے والی ترمیم شدہ میسنجر آر این اے (ایم آر این اے) ٹیکنالوجی تیار کرنے کے لئے طب کا نوبیل انعام 2023 دیا گیا۔

نوبیل کمیٹی نے آج اس کا اعلان کیا۔ کمیٹی نے سوشل میڈیا سائٹ پر کہا کہ "ایم آر این اے ٹیکنالوجی کے باعث کورونا کے خلاف موثر ویکسین کی تیاری میں مدد ملی ہے۔”

اس سال کیٹالین کریکو اور ڈریو ویس مین کو طب کا نوبیل انعام دیا گیا۔ انہیں یہ اعزاز نیوکلیوسائیڈ بیس ترمیم سے متعلق ان کی دریافتوں پر دیا گیا تھا۔ اس دریافت نے کورونا وائرس یعنی کووڈ-19 کے خلاف موثر ایم آراین اے ویکسین تیار کرنے میں مدد کی۔ نوبیل کمیٹی کے سیکرٹری تھامس پرلمین نے کورولنسکا انسٹی ٹیوٹ میں فاتح کا اعلان کیا۔

طب کے شعبے میں نوبیل انعام کے ساتھ ہی دیگر نوبیل انعامات کا اعلان شروع ہو گیا ہے۔ اب منگل کو فزکس، چہارشنبہ کو کیمسٹری اور جمعرات کو ادب کے شعبے میں نوبیل انعام یافتہ لوگوں کے ناموں کا اعلان کیا جائے گا۔ اس کے علاوہ نوبیل امن انعام کا اعلان جمعہ کو کیا جائے گا اور معاشیات کے شعبے میں اس ایوارڈ کے فاتح کا اعلان 9 اکتوبر کو کیا جائے گا۔

ایوارڈز میں 11 ملین سویڈش کرونر (ایک ملین امریکی ڈالر) کا نقد انعام شامل ہوتا ہے۔ فنڈز، ایوارڈ کے بانی اور سویڈش موجد الفریڈ نوبیل کی طرف سے چھوڑی گئی وصیت سے حاصل ہوتے ہیں۔ ان کا انتقال 1896 میں ہوا تھا۔