تلنگانہ میں ایس آئی آر کے دوران 95 لاکھ ووٹروں کے نام حذف ہونے کا امکان

حیدرآباد: تلنگانہ میں ووٹر لسٹوں کی خصوصی جامع نظرثانی (اسپیشل انٹینسیو ریویژن — ایس آئی آر) کی تکمیل تک تقریباً 95 لاکھ ووٹروں کے نام حذف ہونے کا امکان ظاہر کیا جارہا ہے۔ ابتدائی تخمینوں کے مطابق، اس عمل کے آغاز سے قبل ریاست میں ووٹروں کی تعداد تقریباً 3.38 کروڑ تھی۔

اطلاعات کے مطابق، انیومریشن فارم جمع نہ کرانے والے 73.39 لاکھ ووٹروں کے نام مسودہ ووٹر لسٹ سے خارج کردیے گئے ہیں۔ اس کے علاوہ، دستاویزات جمع کرانے والے 92.88 لاکھ ووٹروں کو ان کی اہلیت کی تصدیق کے لیے نوٹس جاری کیے گئے ہیں۔ ان میں سے تقریباً 71.23 لاکھ افراد اب تک اپنی اہلیت ثابت کرچکے ہیں۔

ایس آئی آر کا عمل مکمل ہونے کے بعد تلنگانہ میں ووٹروں کی تعداد گھٹ کر تقریباً 2.43 کروڑ رہ جانے کا اندازہ ہے۔ تاہم، نئے ووٹروں کی درخواستوں کو شامل کرنے کے بعد حتمی ووٹر لسٹ میں تقریباً 2.48 کروڑ ووٹر درج ہوسکتے ہیں۔

حلقہ وار تخمینوں کے مطابق، سرلنگم پلی اسمبلی حلقے میں سب سے زیادہ نام حذف ہونے کا امکان ہے، جہاں 3,29,828 ناموں کو فہرست سے خارج کیا جاسکتا ہے۔ قطب اللہ پور میں 2,76,924 اور ایل بی نگر میں 2,70,284 نام حذف ہونے کا امکان ظاہر کیا گیا ہے۔

حیدرآباد، رنگاریڈی اور میڑچل۔ملکاجگیری اضلاع کے 28 اسمبلی حلقوں میں بڑے پیمانے پر ووٹروں کے نام حذف ہونے کا اندیشہ ہے۔

ایس آئی آر کے تحت حتمی ووٹر لسٹ 9 نومبر کو شائع کیے جانے کا شیڈول ہے۔