قومی اتحاد مستحکم ہوگا: آر ایس ایس

نئی دہلی: راشٹریہ سوئم سیوک سنگھ(آر ایس ایس) نے پیر کے دن کہا کہ دفعہ 370 پر سپریم کورٹ کے فیصلہ سے قومی اتحاد مستحکم ہوگا۔

آر ایس ایس کے آل انڈیا پبلسٹی ہیڈ سنیل آمبیکر نے ایک بیان میں کہا کہ آر ایس ایس شروع سے ہی دستور کی دفعہ 370 کی مخالف رہی ہے۔ سپریم کورٹ کا دفعہ 370 کی برخاستگی کو جائز ٹھہرانا‘خوش آئند ہے۔

راشٹریہ سوئم سیوک سنگھ اس فیصلہ کا خیرمقدم کرتی ہے۔ انہوں نے کہا کہ آر ایس ایس نے کئی قراردادیں منظور کی تھیں اور جموں وکشمیر کو خصوصی موقف عطا کرنے والی دفعہ کی برخاستگی کے مطالبہ پر زور دینے کے لئے چلائی گئی تمام تحریکوں میں حصہ لیا تھا۔

آمبیکر نے کہا کہ اس فیصلہ سے قومی اتحاد کو تقویت ملے گی۔ جموں وکشمیر میں دفعہ 370 کی وجہ سے جن لوگوں سے ناانصافی ہورہی تھی انہیں اس فیصلہ سے راحت مل گئی۔