نیٹ تنازعہ ختم ہوا، اب ایتھنول کی باری ! دہلی کے ٹرانسپورٹرس کا 4 اگست کو پیدل پارلیمنٹ مارچ کا اعلان
احتجاج کرنے والے ٹرانسپورٹرز نے پٹرول کی قیمتوں میں اضافے پر بھی سوال اٹھاتے ہوئے کہا کہ ایک طرف پٹرول مہنگا کیا جا رہا ہے اور دوسری جانب ایتھنول ملا پٹرول فراہم کیا جا رہا ہے، جس سے گاڑی مالکان اور ٹرانسپورٹ شعبے پر اضافی مالی بوجھ پڑ رہا ہے۔
نئی دہلی: دہلی ٹیکسی اینڈ ٹرانسپورٹرز ایسوسی ایشن اور ٹور آپریٹرز کی تنظیموں نے ایتھنول ملا پٹرول، یعنی E20 ایندھن کے نفاذ کے خلاف احتجاج کا اعلان کیا ہے۔ تنظیموں کی جانب سے 4 اگست کو پارلیمنٹ تک پیدل مارچ نکالنے کا فیصلہ کیا گیا ہے۔
ٹرانسپورٹرز کا کہنا ہے کہ E20 ایندھن کے استعمال کے بعد ملک کے مختلف علاقوں سے تعلق رکھنے والے ٹرانسپورٹ آپریٹرز اور گاڑی مالکان کو کئی مسائل کا سامنا ہے۔ ان کے مطابق ایتھنول ملا پٹرول استعمال کرنے سے گاڑیوں کی ایندھن کی کارکردگی میں کمی، دیکھ بھال کے اخراجات میں اضافہ اور انجن کی کارکردگی متاثر ہونے کے خدشات پیدا ہوئے ہیں۔
احتجاج کرنے والے ٹرانسپورٹرز نے پٹرول کی قیمتوں میں اضافے پر بھی سوال اٹھاتے ہوئے کہا کہ ایک طرف پٹرول مہنگا کیا جا رہا ہے اور دوسری جانب ایتھنول ملا پٹرول فراہم کیا جا رہا ہے، جس سے گاڑی مالکان اور ٹرانسپورٹ شعبے پر اضافی مالی بوجھ پڑ رہا ہے۔
ٹرانسپورٹرز اور گاڑی مالکان کا مطالبہ ہے کہ E20 ایندھن کے نفاذ سے متعلق ان کے خدشات کو سنجیدگی سے لیا جائے اور اس پالیسی پر نظرثانی کی جائے۔ 4 اگست کو پارلیمنٹ تک مجوزہ پیدل مارچ کے ذریعے وہ حکومت کے سامنے اپنے مطالبات اور مسائل پیش کریں گے۔
