کوسٹ گارڈز نے بچایا سیلاب سے متاثرہ علاقوں میں پھنسے  افراد کو.

نئی دہلی :   ہندوستانی کوسٹ گارڈز نے شہری انتظامیہ کے ساتھ مل کر کام کرتے ہوئے پچھلے تین دنوں میں مسلسل بارش، شدید سیلاب اور انتہائی چیلنجنگ موسمی حالات کے درمیان چلائی گئی 11 بچاؤ مہمات میں دمن، دادرا اور نگر حویلی نیز جنوبی گجرات کے سیلاب سے متاثرہ علاقوں میں پھنسے 170 افراد کو بچایا ہے۔

وزارتِ دفاع نے ہفتہ کو بتایا کہ بدھ اور جمعرات کی درمیانی رات کو خانویل، سلواسا سے پانچ پھنسے ہوئے افراد کو بچا کر راحت و بچاؤ مہم شروع کی گئی۔ اس کے بعد، کدئیا ساحلی علاقے میں سیلاب سے متاثرہ ندی کے کنارے پھنسے تین ماہی گیروں کو بھی محفوظ نکالا گیا۔ سب سے بڑی بچاؤ مہمات میں سے ایک میں، سیلاب سے متاثرہ ویلسپن انڈسٹریل ایریا میں پھنسے 60 افراد کو، جہاں سڑک کا رابطہ مکمل طور پر منقطع ہو گیا تھا، جمعرات اور جمعہ کی درمیانی رات کو محفوظ نکالا گیا۔ اس کے بعد چلائی گئی مہمات میں ایرو فائبر پرائیویٹ لمیٹڈ کے قریب سیلاب کے پانی میں پھنسی ایک بس سے سات افراد کو بچانا، ڈونگری سے دس افراد کو نکالنا، ولساڈ-پارڈی علاقے سے ہیلی کاپٹر کے ذریعے پھنسے چار افراد کو بچانا اور ریلائنس انڈسٹریز کے علاقے سے رات بھر میں آٹھ افراد کو نکالنا شامل تھا۔

ایک اور اہم بچاؤ مہم میں کوسٹ گارڈز نے اودھ سوسائٹی کے علاقے سے دس افراد کو نکالا، جن میں نو ماہ کی حاملہ خاتون اور سانس لینے میں تکلیف سے متاثر ایک خاتون شامل تھیں اور انہیں وقت پر طبی امداد فراہم کی گئی۔ جمعہ کو، ہندوستانی کوسٹ گارڈز کے دو ہیلی کاپٹروں نے نوساری ضلع کے مینڈر گاؤں سے 33 پھنسے ہوئے افراد کو کامیابی کے ساتھ ایئر لفٹ کیا، جن میں ایک ایسا شخص بھی شامل تھا جسے سینے میں شدید درد ہو رہا تھا اور اسے فوری طبی امداد فراہم کی گئی۔

خراب موسم، تیز بہاؤ اور خطرناک حالات کے باوجود، کوسٹ گارڈ کے اہلکاروں نے بغیر کسی وقفے کے بچاؤ کا کام جاری رکھا۔