حیدرآباد میں بارش۔ کئی اضلاع کے لئے محکمہ موسمیات کا الرٹ

حیدرآباد: شہرحیدرآباد میں کل شب بارش ہوئی۔بارش کا سلسلہ تقریبا نصف گھنٹہ تک جاری رہا جس کے سبب بعض سڑکوں پر پانی جمع ہوگیا۔

شہر کے کئی علاقوں میں بجلی کی سپلائی بھی تقریبا ایک گھنٹہ تک متاثررہی۔اسی دوران محکمہ موسمیات نے ریاست میں تین دن تک بارش کی پیش قیاسی کی ہے۔

محکمہ موسمیات نے اپنی رپورٹ میں کہا کہ خلیج بنگال میں بنے ہوا کے کم دباو کے نتیجہ میں آئندہ تین دن تک ریاست کے بیشتر مقامات پر اوسط یا شدید بارش کا امکان ہے۔

جئے شنکر بھوپال پلی، ملگ، بھدرادری کوتہ گوڑم، کھمم، نلگنڈہ، سوریاپیٹ، رنگاریڈی، حیدرآباد، میڑچل ملکا جگری، سنگاریڈی، ناگر کرنول، ونپرتی، نارائن پیٹ، جوگولامباگدوال، یادادری بھونگیر، میدک کے لئے الرٹ جاری کیاگیا ہے۔

محکمہ موسمیات کے مطابق ہوا کا کم دباؤ جمعہ تک طوفان میں تبدیل ہو جائے گا جو شدید طوفان میں بدل جائے گا اور ہفتے کی شام تک بنگال اور بنگلہ دیش کے اوپر سے گزر جائے گا۔

بتایا گیا ہے کہ جنوب مغربی مانسون بھی سرگرم انداز میں پیشقدمی کررہا ہے۔