سوریہ پیٹ: آوارہ کتوں کے حملے میں 100 بھیڑیں ہلاک، چرواہے کو لاکھوں روپے کا نقصان

سوریہ پیٹ: ضلع سوریہ پیٹ کے تنگاترتی منڈل کے تورپوگوڈم گاؤں میں چہارشنبہ کی صبح آوارہ کتوں کے جھنڈ کے حملے میں تقریباً 100 بھیڑیں ہلاک ہوگئیں۔

بھیڑوں کے مالک ڈی رویندر نے منگل کی دیر شام اپنے کھیت کے پاس واقع باڑے میں اپنی 200 بھیڑیں رکھی تھیں اور گاؤں میں واقع گھر چلا گیا تھا۔

چہارشنبہ کی صبح جب وہ واپس آیا تو دیکھا کہ کئی بھیڑیں مردہ پڑی ہوئی ہیں جبکہ کئی زخمی تھیں۔ ویٹرنری ڈاکٹر کو طلب کرکے معائنہ کیا گیا تو انہوں نے بتایا کہ کتوں کے حملے میں ان بھیڑوں کی موت واقع ہوئی ہے۔

رویندر نے بتایا کہ اس واقعہ کی وجہ سے انہیں تقریباً دس لاکھ روپے کا نقصان ہوا ہے۔

اسی دوران کوتہ گوڑم ضلع کے ایک گاؤں میں بھی آوارہ کتوں کے اسی طرح حملے کے باعث ایک چرواہے کی تقریباً 20 بھیڑیں ہلاک ہوگئیں۔ بتایا گیا ہے کہ اس حملہ کی وجہ سے چرواہے کو تقریباً 2 لاکھ روپے کا نقصان ہوا ہے۔