پی ایف آئی کیس، راجستھان میں 7 مقامات پر این آئی اے کے چھاپے

نئی دہلی: نیشنل انوسٹیگیشن ایجنسی(این آئی اے) نے ہفتہ کے دن راجستھان کے 7 مقامات پر تلاشیاں لیں۔ ممنوعہ تنظیم پاپلر فرنٹ آف انڈیا(پی ایف آئی) کی غیرقانونی سرگرمیوں سے جڑے کیس کے سلسلہ میں یہ تلاشیاں لی گئیں۔

مشتبہ افراد کی رہائشی اور کمرشیل جگہوں پر چھاپے مارے گئے۔ کوٹا میں 3 مقامات پر اور اضلاع مادھو پور‘ بھیلواڑہ‘ بندی اور جئے پور میں فی کس ایک مقام پر دھاوے ہوئے۔ وفاقی ایجنسی کے ترجمان نے یہ بات بتائی۔

تلاشی کے دوران ڈیجیٹل آلات‘ تیز دھار ہتھیار اور قابل اعتراض کاغذات ضبط کئے گئے۔

آئی اے این ایس کے بموجب این آئی اے نے ہفتہ کے دن بتایا کہ اس نے ممنوعہ پاپلر فرنٹ آف انڈیا کے مبینہ ارکان کے 7 ٹھکانوں پر چھاپوں میں ڈیجیٹل آلات‘ ایرگن‘ دھاردار ہتھیار اور قابل اعتراض دستاویز ضبط کی ہیں۔

ذرائع کے بموجب راجستھان میں یہ دھاوے کوٹا‘ بھیلواڑہ‘ سوائے مادھو پور‘ بُندی اور دیگر مقامات پر ہوئے۔ ذرائع کا کہنا ہے کہ گرفتاریاں ممکن ہیں۔