اردو میڈیم اسکول کی بندش پر اساتذہ تنظیموں کا احتجاج، بحالی کا مطالبہ، بھوک ہڑتال کی نوٹس پیش

نرمل: ضلع نرمل میں واقع گورنمنٹ پرائمری اسکول اردو میڈیم پنجہ شاہ کی مبینہ طور پر جان بوجھ کر بندش کے خلاف اساتذہ تنظیموں ٹی ایس پی ٹی اے اور میوا نے شدید احتجاج درج کراتے ہوئے فوری بحالی کا مطالبہ کیا ہے۔

اس سلسلے میں تنظیموں نے ضلع مہتمم تعلیمات کو غیر معینہ بھوک ہڑتال کی نوٹس بھی پیش کر دی ہے۔

تفصیلات کے مطابق اسکول میں تقریباً 20 طلبہ زیر تعلیم تھے، تاہم سابق منڈل ایجوکیشن آفیسر (ایم ای او) نرمل اربن کی جانب سے اچانک اسکول کو بند کر دیا گیا اور طلبہ کو ڈراپ آؤٹ ظاہر کیے جانے پر اساتذہ تنظیموں میں سخت ناراضگی پائی جا رہی ہے۔

تنظیمی قائدین کا کہنا ہے کہ تعلیمی سال کے اختتام کے قریب ہونے کے باوجود اسکول کی بحالی میں تاخیر حکام کی غیر ذمہ داری کو ظاہر کرتی ہے۔

اس موقع پر تنظیم کے ضلعی صدر شیخ شبیر علی اور جنرل سیکریٹری ڈاکٹر ساجد معراج نے سخت ردعمل ظاہر کرتے ہوئے کہا کہ طلبہ کے مستقبل سے کھلواڑ کرنے والے عہدیداران کے خلاف فوری کارروائی ضروری ہے۔

انہوں نے الزام لگایا کہ اس معاملے پر پہلے بھی ضلع مہتمم تعلیمات اور ورنگل کے آر جے ڈی کو متعدد شکایات پیش کی گئیں، مگر کوئی مؤثر اقدام نہیں کیا گیا۔

تنظیموں نے مطالبہ کیا ہے کہ ایک ہفتے کے اندر اسکول کو سرکاری طور پر دوبارہ بحال کیا جائے اور ذمہ دار سابق ایم ای او کو فوری طور پر معطل کیا جائے۔ بصورت دیگر، انہوں نے خبردار کیا کہ مقامی آر ڈی او دفتر کے سامنے غیر معینہ بھوک ہڑتال شروع کی جائے گی۔

اس موقع پر پروین کمار، مقصود احمد، محمد آصف، شیخ فاضل، محمد عبدالعلیم، ماجد محی الدین، سید مظہر حسین اور محمد عادل سمیت دیگر افراد بھی موجود تھے۔