تلنگانہ: امتحان میں ناکامی کا خوف، طالبہ کی خودکشی

حیدرآباد: تلنگانہ کے میڑچل ضلع کے میڈی پلی پولیس اسٹیشن کے حدود میں ایک انٹرمیڈیٹ سالِ اول کی طالبہ نے سپلمنٹری امتحان میں ناکامی کے خوف سے خودکشی کر لی۔

مقامی افراد کے مطابق، گجویل ضلع کے کیاتھور گاؤں سے تعلق رکھنے والے شیواجی راج وینکٹ ریڈی روزگار کی تلاش میں پیرازادی گوڑہ کے آدرش نگر میں مقیم ہیں۔

ان کی بڑی بیٹی 16 سالہ ہیما وایشنوی بوڈواپل کے ایک پرائیویٹ کالج میں انٹرمیڈیٹ سالِ اول کی طالبہ تھی۔

سالِ اول میں دو مضامین میں ناکام ہونے کے بعد اس نے سپلمنٹری امتحانات دیئے تھے لیکن ان میں بھی ناکام ہونے کے خدشہ سے وہ شدید ذہنی دباؤ کا شکار ہوگئی۔

اسی ذہنی دباؤ کی حالت میں وایشنوی نے پھانسی لگا کر خودکشی کرلی۔گھر والوں نے فوری طور پر پولیس کو اطلاع دی۔ پولیس نے مقدمہ درج کرکے تحقیقات شروع کردی ہے۔