چندریان 3 کا بجٹ ہالی ووڈ کی خلا سے متعلق بنائی گئی کئی فلموں سے بھی کم

دہلی: خلائی مشن چندریان 3 نے چاند پر اتر کر تاریخ رقم کر دی جس کے بعد اس کے بجٹ کے حوالے سے خبریں گردش کر رہی ہیں۔

خلائی مشن چندریان 3 نے کامیابی سے چاند کے جنوبی قطب میں لینڈنگ کر کے تاریخ رقم کر دی تاہم اس تاریخ ساز موقع کے ساتھ ہی چندریان سے جڑی کئی خبریں میڈیا کی زینت بن رہی ہیں۔

جیسا کہ سوشل میڈیا پر یہ خبر وائرل ہو رہی ہے کہ چندریان کا بجٹ ہالی ووڈ کی خلا سے متعلق بنائی گئی کئی فلموں سے بھی کم ہے۔

سوشل میڈیا پلیٹ فارم ایکس پر ’نیوز تھنک‘ نامی پیج نے پوسٹ کرتے ہوئے اس جانب توجہ دلائی کہ ہندوستان کا یہ مشن ہالی ووڈ کی کئی فلموں کے مقابلے میں بہت سستا ہے بلکہ اس پروجیکٹ پر کام کرنے والے سائنسدانوں کی تنخواہیں فلمی ستاروں سے کئی گنا کم ہیں۔

ایک اور پوسٹ شیئر کرتے ہوئے چندریان تھری مشن کے بجٹ کا موازنہ دیگر کئی بڑے بجٹ کی مشہور و معروف فلموں سے بھی کیا۔

اس پوسٹ کے شیئر ہوتے ہی ٹیسلا اور اسپیس ایکس کے مالک ایلون مسک بھی میدان میں کود پڑے اور کہا یہ بھارت کے لئے اچھا ہے اس کے ساتھ ہی انہوں نے بھارت کے جھنڈے والا ایموجی بھی استعمال کیا۔