سرکار کی غلط پالیسیوں کے سبب ملک معاشی بحران کی طرف بڑھ رہا ہے نائب لیڈر اپوزیشن

نئی دہلی :  کانگریس کے راجیہ سبھا رکن اور اپوزیشن کے نائب لیڈر پرمود تیواری نے بڑھتی ہوئی مہنگائی کے حوالے سے مرکز کی مودی حکومت پر سخت نکتہ چینی کی اور کہا کہ حکومت کی غلط معاشی پالیسیوں کی وجہ سے ملک معاشی بحران کی طرف بڑھ رہا ہے۔

مسٹر تیواری نے بیان جاری کر کے کہا کہ تازہ اعداد و شمار کے مطابق خردہ مہنگائی کی شرح بڑھ کر 4.38 فیصد پر پہنچ گئی ہے، جو گزشتہ تقریباً 18 ماہ کی سب سے اونچی سطح ہے۔ انہوں نے دعویٰ کیا کہ شہری علاقوں میں مہنگائی کی شرح 5.09 فیصد اور دیہی علاقوں میں 5.45 فیصد ہونے سے عام جنتا کی زندگی مشکل ہو گئی ہے۔ انہوں نے کہا کہ وزیر اعظم نریندر مودی بیرونِ ملک اعزاز حاصل کرنے کا دعویٰ کرتے ہیں، لیکن ان کی معاشی پالیسیوں کی قیمت ملک کے عوام بڑھتی ہوئی مہنگائی کی شکل میں چکا رہے ہیں۔ انہوں نے الزام لگایا کہ حکومت کی غلط پالیسیوں کی وجہ سے ملک معاشی بحران کی طرف بڑھ رہا ہے اور عام لوگوں پر مسلسل بوجھ بڑھتا جا رہا ہے۔

بی جے پی ایم پی نشی کانت دوبے کے ایمرجنسی سے متعلق بیان پر ردِعمل کا اظہار کرتے ہوئے مسٹر تیواری نے کہا کہ آج حکومت کے خلاف آواز اٹھانے والوں پر ای ڈی، سی بی آئی اور انکم ٹیکس جیسے محکموں کا غلط استعمال کیا جا رہا ہے۔ انہوں نے الزام لگایا کہ اظہارِ رائے کی آزادی پر خطرہ منڈلا رہا ہے اور میڈیا کی غیر جانبداری پر بھی سنگین سوالات اٹھ رہے ہیں۔ انہوں نے بی جے پی رہنماؤں کو دوسروں پر الزام لگانے سے پہلے خود احتسابی کی نصیحت دی۔